2012-06-23

اعندلهــــا


 
هى الدنيا كده
عايزة العنيد والمثابر
عايزة الحكيم والمجنون
عايزاك مرة تكون ومرة متكونشي
وساعات دفايان سقعان
وساعات مخنوق حران
بس انت لازم تعندلها
وفي وسط دة كله تكون مبسوط بعندها

جربت مرة تندهلها
ولما ترد تقولها
اصل كنت بجرب صدى صوتى
طيب جربت مرة تخلص كل الادوار
اللى بتفرضها عليك
وتعملها مفاجأة بدور سعيد
وتقولها انا البطل
انا الهمام اللى جاى بيجري عليكى
هياخدك في حضنه ويطبطب عليكى
 ويحسسك بالامان
جربت تفكر انها ممكن تكون هى كمان محتاجه
لدفيان

جرب حاجات جديده وفاجئ نفسك بيها
ولما حد يسالك بتعمل دة ليه
اقوله اصل مبقاش فارق
جرب تكون سقعان جدا وفي عز الشتا
تاخد دوش بارد
تطلع تعطس وتاخد دور برد جامد
بس هتضحك علشان عارف انك مجنون
وانك طلعت قدها
وانك هتعيش مش هتموت

جرب تتقمص طول اليوم
شخصيه حد تعرفه
من اصحابك قلده
متسبيهوش الا وهو مخنوق منك
وممكن يكون مش عايز يعرفك
ولما نهايه اليوم تقرب
اضحك وقوله
ادينى ورتلك نفسك
شوف ازاى انا مستحملك

جربي تعاكسي
راجل عاجوز ماشي
مخنوق وشايل الهم واضحكيله
وقوليله كده خبط فيا ياحج

متضايقش لو محدش قدر
او حد بالغ في انه يقدر
او حد مفكرش انه يقدر
المهم انت فعلا قادر تقدر

تعالى في يوم ورد شويه
من اللى اصحابك بيعملوه فيك
قولهم يلا نخرج
ومغزى الخروجه كله نقد فيهم وشتيمه
واعمل دة وانت برضوا بتضحك
وارجع البيت وانت ماشي بس
مش علي الارض
وقولى ممكن تحس بإيه
ساعتها

قبل ما تنام استغفر ربنا كنير
اكيد انت عارف ذنوبك
وعمايلك في البشر كترت
احمده انك لسه بتتنفس
ولسه عندك طاقه انك تنبسط

قول لنفسك ان مافيش شئ اسمه
مستحيل عرفها كويس
انك اللى بتصنعه لما بتحطي شئ
يكون هدفك
يعنى انت ممكن تصنعه وفي يوم تغير هدفك
وميبقاش الشئ مستحيل
يعنى انت الخالق الوحيد لافكارك
اخرجها صح وبطل تهيس

جربي تحمدى ربنا طول اليوم
حتى لو مش قادره او عارفه تشوفي
ايه اللى ممكن تحمدى عليه
خليكى متاكده دايما انه اكيد عملك حاجه
بس هتعرفي نتجتها بعدين

اصحى علي الفجر واسمع زقزقه العصافير
هتحس بموسيقي افضل من موسيقي
عمار الشريعي
ولو معجتبكش اوى ابقي ادعى عليا
ساعتها وافتكرنى واضحك
انى قدرت اخليك تعمل شئ
ممكن تكون مكنتش قادر تقتنع بيه

خليكِ فاكرة ان كل اللى تعرفهم
بشر الا مكنتش انت نفسك بتغلط
وبتتعلم

متتوقعش من حد حاجه اكبر من حجمه
ومتحطش املك في حد خلى املك دايما وبس
في ربنا

تعالى يوم وغير الروتين
اعند مع طفل وباينله
انك اعيل منه

هات مصاصه وامشي كلها
في الشارع وانت مبتسم
لانك بكده هتحط بسمه علي وجوه كل اللى بتقابلهم

ادخل في مناقشه سياسيه واقول كلام مالوش معنى
واقعد اضحك هتنرفزهم
وهتكترمن عصبيتهم
بس الاكيد انك هتفرفشهم

تعالى يوم وبطل مناقشات خالص
بطل وجع قلب وحرق مخ
وكل ما حد يناقشك
 بربش واغمز
هيوصل انه هيقف ويسالك بتعمل كده ليه
ساعتها بقي ياعم الحوار بقي في ايدك
خده واسرح بي وخلى مش فاهم اى حاجه
من كلامك بس الاكيد
انك قدرت تخلى يسكت

ادخل اوضك بس خليك فاتح الباب
اعمل كل شئ في النور
هتخاف من ايه
كده كده هما
عارفين انت بتعمل ايه وفين
طالما مقتنع باللي بتعمله
اظهره وبينه واعلن عنه
دة حلمك اللى بتجري وراه
اوعى تخليهم في يوم
يحبطوك

آمن بنفسك اوى
عرفها انها موهوبه
في اى شئ بتعمله
ومميزة كمان
ومافيش مانع لو تدلعها
كل فترة بكلمه حلوة
بس خليك دايما عارف
ان الكذب مالوش رجلين
وانك  عمرك ما كنت عاجز

حبها وطهقها وزهقها بس عاندها
وخليك دايما فاكر
انك فيها انهارده  

 .....بس بكرة متعرفش هتكون فين وليه


بعد ما تخلصوا اتفرجوا علي الفيديوا هيعجبكم جدا
 
 


اضغط

هناك 15 تعليقًا:

  1. جميلة اوى يا رنا
    محتاجين جدا احنا دعوتك للتفاؤل
    احساس رائع لما تعمل حاجة جديدة
    ولما توصل لاحساس عمرك ما تخيلت انك تحس بيه
    بحب كلامك لما يكون حماسى و ليه رسالة :)

    ردحذف
  2. اولا كنت عندك في نفس الوقت وانتي ديما ده كل يوم علي كدة علي فكرة
    :))

    ثانيا صحبتك مها وحشتني
    ووحشني كلامها

    ثالثا
    حبدا بالفيديو الاخير ده
    ملهوش حل تعرفي لما بعتي عندي لينك الفيدو قلت يا اما ده يا اما بتاع دانبو

    انا لسه مشوفتش اللي عندي
    :))

    الفيديو اللي هنا ده ملهوش حل
    ..........

    كل الي قليته ده جمييييييييييل اوي نفسنا نعمله
    بس تعرفي ساعات بعمله لما بكون رايقة مبسوطة لما بحس البحب وابقي نفسي كل الي حواليا يحسوه اوي ابقي مبسوطة وحاسة كل الدنيا بتضحكلي ومش عايزة حد يبقي زعلان
    :))

    ووبس بقي

    ردحذف
  3. جمييييييييييييييلة اوووووووى
    وعجبنى التفاؤل ده ياريت نقدر نعمل كده

    ردحذف
  4. ممممممممممممم

    وسعات اكل آيس كريم بندق
    واسمع دياب،، او منير

    ساعات اشغل اغاني شعبي مطرقعة
    وافضل اهيس عليها واخرج كل الطاقة السلبية اللي جوايا،،،

    وساعات،، لا كتير
    اقعد أحب،، الحب أجمل دعوة للتفاؤل

    ردحذف
  5. جمييييييييييييله ... جداااااااا .. زيك كده :)

    ردحذف
  6. هي فكره والتغيير والاختلاف مهمين جدا
    بس مين يقدر يكون مختلف
    مين يعرف يكون مختلف
    ومين يقدر يتحدى نفسه قبل ما يتحدى الي حواليه

    كلها افكار جميله حبيتها :)

    ردحذف
  7. أولا فيديو راااااااااااائع وكلام أروووووووووووعى

    حلوووووووووووة اوووووى التدوينة دى بجد خلتنى ابتسم من قلبى :)

    ردحذف
  8. هههههههههههههههههههههههههههههه اه جربت كل دا جربت تكسرنى وانكسر وجربت تكسرنى واطلعلها لسانى وجربت اكسرها مليون حته

    جربت جنانى وايمانى ضميرة وعدمة وعصيانى ومتعتى بتوبتى اه جربت اكون انسان وبحمد ربنا انه منحنى انسنيتى ولم يخلقنى ملاك

    سعيدة هنا وعجبنى جداااااااااااا بوستك واسلوبك العامى السلس تحياتى

    ردحذف
  9. الطاقة الإيجابية رجعتلك من تاني..أنا سعيدة بكدا:)
    ولازم الإنسان فعلاً يكون عند إرادة واصرار عشان ينجح ويوصل..جميلة يارنا..ويارب طاقتك الإيجابية تزيد يوم ورا يوم:)ولازم الإنسان فعلاً يكون عند إرادة واصرار عشان ينجح ويوصل..جميلة يارنا..ويارب طاقتك الإيجابية تزيد يوم ورا يوم:)

    ردحذف
  10. انتي بتسخنينا علي الدنيا ماشي ماشي :)

    ردحذف
  11. ادخل اوضك بس خليك فاتح الباب
    اعمل كل شئ في النور
    هتخاف من ايه
    كده كده هما
    عارفين انت بتعمل ايه وفين
    طالما مقتنع باللي بتعمله
    اظهره وبينه واعلن عنه
    دة حلمك اللى بتجري وراه
    اوعى تخليهم في يوم
    يحبطوك
    _________________
    صباح الغاردينيا يارونائي الحلوة
    مش عارفة بجد أقتبس ايه غير الأمل والتفاؤل والحلم الي كنتي بتزرعيه في كل سطر كتبتيه هنا بجد لو كل شخص عمل الي في البوست حيكون سعيد ومتفائل يمكن أخترت حتتة الحلم عشان دايماً بعمل المستحيل عشان الدنيا ماتهزمنيش عشان مش حقدر اتحمل حياتي من غير حلم عشان رغم ظروفي الصحية وظروف زواجي من فارس لازلت بحلم وبحلم وببتسم عشان محتاجة أعيش :) "
    ؛؛
    ؛
    ربنا يسعد قلبك وأيامك
    وأشوفك دايماً مبتسمة وسعيدة
    على فكرة بحبك اوي "
    ؛؛
    ؛
    لروحك عبق الغاردينيا
    كانت هنا
    reemaas

    ردحذف
  12. مبدأيا كده أنا ممكن أعمل أي حاجه من اللى قولتيها دى وممكن أتشقلب كمان لو حبيت

    بس انى اخد دش مايه ساقعه في الشتا اهوه ده المستحيل بعينه ولا في الصيف وحياتك يا أختى أصل انا ربنا أخد مني كل حاجه وأدانى الصحه هههههههه وانا بقى صحتى مبتجيش الا على الميه السخنه هههههههه^_^

    تدوينة جميله اوى وكلها فعلا تفاؤل ودمها خفيف زى اللى كتباها بحبك لما بتدي أمل بكلامك

    ردحذف
  13. :D جميلة اوى خصوصا الصورة
    تسلم ايدك

    ردحذف
  14. فين كانت يابنتى دعوتك للتفائل دى
    انا كنت ومازلت محتجاها جداااا
    جميل والله ان الواحد ياخد الدنيا على صدره كده ومش يبقى عاملها حساب
    لو مش بقت اجمل
    اكيد هترسم ضحكه على وشنا احنا محتاجينها

    سيبك انتى
    انا زعلانه منك :P

    ردحذف
  15. عيش حياتك بالطول و العرض
    محدش واخد منها حاجة
    جميل جدا يا رنا

    ردحذف