2012-01-22

الفكرة (5_1)


الفكرة في بعض الكلمات في حياتنا

(1)الامتحان

يعنى توتر
يعنى ضغط وشد اعصاب والدكتور هيجيب ايه
او الاستاذ اللي بيحط امتحان الثانوى هيبقي رفيق بينا ولا لاء

ابعدوا عن الفكرة العامه والمفهومه للامتحان
عن اول حاجه ممكن تفكر فيها
لما اقولك كلمه امتحان
تعالوا نبص للامتحان نظرة تانيه كدة
الامتحان يعنى تجربه
تجربه يعنى تعليم
تعليم يعنى استفاده
استفاده يعنى نشر
والنشر يعنى النجاح
يعنى انا فعلا بتمرمط
في الامتحانات
بس لما بنجح وبنجح بتقدير حلو
بحس ان تعبي كان في محلو
وبحس بانبساط
لولا المرمطه ما كانت تاتى السعاده

لو فكرنا في الامتحانات اللى بتعدى علينا
هنلاقي اننا
كل يوم بنمر بامتحانات يوميه
امتحانات ربانيه
امتحانات وتجارب عمليه من اللى حوالينا
امتحانات في دراستنا
امتحانات في شغله
وبتعدى وبنقع احيانا وبننجح غالبآ
لان بداخل كل واحد فينا اصرار
ودواافع واهداف بتخلى ميعرفش معنى الفشل
وميحبش يعرفه ولا يدوقه
انت ناجح لانك مش عايز تكون فاشل
عايش وبتذاكر كل سنه
منتحرتش او مجتش ليك حاله نفسيه
خلتك متكملش تعليم

حكايتى مع الامتحانات

انا من النوع اصلا اللى توتره داخلى
لو حاسه ان المادة هتتشال مبقولش لو مستصعباها
بحاول افهمها لنفسي
بعتمد علي نفسي بشكل كامل ولان ماما وبابا مكنوش فاضين
ليا طول الوقت خلونى اتحمل مسئوليه فشلي او نجاحى
مكنتش شاطرة اوى بس كنت لما بصمم انجح بنجح ومش باي درجه
بدرجات عاليه
لم بحب مادة المادة دى لو نقصت ربع درجه بزعل
مكنتش من محبين العياط و الكلام دة 
خاصه في الكليه بزعل وبدعى 
علي الدكتور بس لما بيغلس علينا
كليتى كانت
حقوق معروفه بمذاكرتها طبعآ
يعنى كنت بذاكر بمجهود ضعف الدرجه اللى باخدها في الاخر
بس اول ما دخلت الكليه اللى بالنسبه ليا كانت
كائنه فضائيه غير معروفه ومعرفه ليا
اتمرمط اول ترم تانى ترم ابتديت افهم
في تانيه كانت الدنيا ايسر علشان حببت نفسي فييها
علشان حولت جملتى من انها اهي كليه وخلاص
لكليه وهتنجحى فيها بتقدير
ومع الايام حاسيتها قدري
اصل مش معقول بعد دة كله متكنش قدري
حتى شلتى كلها دخلتها واصبحنا مرمطه جماعيه
ومن ساعتها اتعاملنا معاها كانها ماتش كورة
كل ترم وكل نص مباره  بنتعمق اكتر وندخل ونهدف اكتر
وكنا لا احنا لا هى والحمد الله كنا دايما احنا
لما اتخرجنا زى ما احنا منها ومعظمنا تقديرات والباقي مش شايل حاجه
كنا احنا
لما اتخرجنا والكل بيشهد باخلاقنا
كنا احنا
لما مغيرتش فينا تلقئيتنا وبراءتنا
كنا احنا
لما البعض عمل كارنيه النقابه
ومارسها ويدخل اى مكان يضربله تعظيم سلام
كنا احنا
لما كان فينا اللى اتجهه لتعليم تانى ومجال تانى
كان بيحبه وكان فخور بنفسه وبذاته
واهله فخورين بي
كنا احنا
اللى مر فيها بازمات ومحنات
وعرف يقلبها لمنحات
ونجح بعدها بتقدير وبتفوق
كنا احنا برضوا
سبحان الله اللي بينام ويصحى
علي شئ عايز يحققه ويسعى لى علي قد
قدرته ويسيب الباقي علي ربنا
بيحقق حاجه فعلا
اقدر اقلكم اننا كنا احسن من حسن حشاته
بكل الوجوة وفي كل الامتحانات
الحمد الله ودة كان فضل ونعمه من ربنا
علينا علشان كدة حقوق كانت قدرنا
ونصيببنا الذي لا مفر منه
 دايمآ بنواجه امتحانات
في حياتنا
ومنكونش قدها ونقف قدامها
لاما نكون ضعفاء ونقع في دومات الدنيا
كل واحد جواه اراده تهد جبال
لو وجهه صح هيفوز وهيهدف
لو حاول باقصي ما عنده عمر ربنا ما هيخيب
ظنه
ودى كانت حكايتى مع الامتحانات
يا تري ايه حكايتكم انتم ؟

ودلوقتى انتقل للجزء التانى 
ونقول بلاش اغنيه تتماشي مع النص
نغير بقي
وبما انى بموت في السرقه
سرقت حاجه
لشاعر اسلام ^_^

ليه الضيق ؟

والبراح مفتوحلنا ..

مش طريق واحد لابد ..

انه يدلنا

جرب ودوس

تفشل يجوز

الفشل ليه بردو معنى عندنا ..

~ . ~ . ~ . ~

اعرف حواسك

ايه اللى ناقصك

ايه وكام ؟؟

هتكون مكاسبك

فكرة فى عقلك

كلمة فى قلمك

خطها بعد ما حسيتها بقلبك ...

كسر حواجز عدتها روحك

قبل ما توصل ليك فى جسدك ..

انت نفسك ..

فضى يأسك .. من جوارحك

انتصر للفرح ..

بعد الجرح ..

وقوى فرصك

 

 

هناك 50 تعليقًا:

  1. أى إنسان بنجح فى شئ لما بيتغير نظرته للأمور, وهو حر أما أن يجعلها سلبية أو إيجابية.

    ولكن ممتازة رونى قدرتي تخليها إيجابية يامحاميتنا الكبيرة:)

    ردحذف
  2. انت اللي كبير :)

    والله يانيللي هو المفترض دايما نبص لنعم التانيه قبل ما نبص علي النقمات اللى في حياتنا
    ممكن كتير نفشل بس الغالب اننا مازالنا عايشين وبنتعلم يبقي دة نجاح في حد ذاته
    احيانا الواحد بيكتئب وينزوى ويكتشف انه من غير شئ او ايه السبب الفاضي دة :)

    نورتينى

    ردحذف
  3. حسيت انى قاعده ف الامتحان
    بس بجد كلامك جامد
    كل واحد لو اعتمد على قدراته وشاف اللى جواه صح يقدر ينجح ويطور نفسه
    حلوة الفكرة يا رونى :)

    ردحذف
  4. الله يخليكى يا آيه

    دى كانت سلسه افكار ودى الفكرة الخامسه واحد :) هبقي اديكى لينك الباقين تمزمزى فيهم براحتك

    مبسوطه انها عجبتك:)

    ردحذف
  5. أكتر حاجة بجد بحبها فى تدويناتك يا رنا هى " التفــــاؤل"
    طاقة إيجابية جميلة .. ماشاء الله ربنا ما يحرمك منها بل يزودها ^^
    "ماسكة الخشب أهو :D "

    أنا بقى بم إنى فى الامتحانات وفى قلب الحدث :D .. مبحبش إحساس الأيام دى بصراحة
    وببقى متوتره جدا من اللى كتبته ومتوتره أكتر مش شكل النتيجة يا ترى هاتبقى ازاى
    بس الحمد لله بتعدى على خير :)
    وربنا يعديها على خير كل مرة كدة :D

    ردحذف
  6. بصي يارنا يابنتي ههههه

    انا بقي زماااان اوي اياااام الامتحانات دي

    كانت بتجيلي حالة لامبالاة

    يعني اللي ذاكرته طول السنة

    كنت اراجعه علي خفيف

    ويوم الامتحان كان بيبقي يوم عادي عندي زي باقي ايام الاسبوع

    جايز عشان مكنش عندي طموح علمي

    ومكنتش تهمني حكاية الشهادة دي اوي


    بلد بتاعة شهادات صحيح ههههههه

    تحيتي يارنا

    ردحذف
  7. ايمى
    يعجبنى الناس اللي في القلب الاحساس
    علي فكرة انا كنت بحب الفترة دى ومفتقداها ومفتقده عشتى فيها

    معرفشي كانت بتجيى عليا بتهيس وشغل اكتر وتواصل مع البشر اكتر كانت بتبقي فترة حلوة
    خاصه لما اكون اوردى في مادة بحبها ومذاكرها كويسه وراحا امتحن علشان اثبت دة ^_^

    ردحذف
  8. ينهار ايمى ناسيت اقولك

    قلبي معاكى ودعواتى ليكى بالتوفيق والنجاح يارب

    والمهم انك نورتينى بيجد
    ان شاء الله تعدى وتنجحى بتقديرات كمان :)

    ردحذف
  9. ابي الروحى واستاذي سواح :)

    اضحك اضحك انا اتعود علي كلمه بنتى دى خالص ^_^

    طيب بجد يعنى نفسي اعمل فكرة عن ليه الولاد بيبقوا ضاربين عرض الحائط بالامتحانات ومش بيبقوا متوترين زي البنات وبيخلصه الملزمه اسرع وينزل يلعب ماتش كورة هههههههههه

    رايقين والنعمه
    انا اكدب لو قولت نو توتر خاصه لو مادة صعبه وعملت مجهود بس دة بيبقي داخلى انما من برة هتلاقينى بضحك ببلاهه كدة ومهيسه جدآ في اى مادة ^_^

    نورتنى بجد
    بغض النظر عن الامتحانات والمذاكرة

    مافيش امتحانات تانيه كنت مهتم بيها ومهتم تنجح فيها طيب :)

    ردحذف
  10. لا فيه

    كل شغل بعمله وبيعجب الناس

    بيبقي امتحان بالنسبة لي

    وببقي خايف زي ميكون داخل امتحان بالظبط

    اما من ناحية الامتحانات الثانية اللي تقصديها

    فمشكلتي اني قدري يعني مؤمن بالقدر

    ردحذف
  11. استاذ سواح

    تمام اوى جدآ

    اكتر حاجه بتعجبنى فيكم ياجماعه انكم بتقروا افكاري انا كنت هعمل الفكرة 5-2
    عن القدر

    نورتنى كالعاده :)

    ردحذف
  12. قبل اى حاجه
    انتى جميله على فكره <3
    اصلا انتى خرجتينى من فكره الامتحان نفسها لحاجات تانيه كتير فكرت فيها بنفس الطريقه
    فى الاول خدتينى من الامتحان للقدر اللى لازم مش ناخده اهو حاجه والسلام لا ناخده كمان هدف
    لحاجات كتير المفروض نستخدمها لصالحنا اكتر ما تكون ضدنا
    كلامك على الكليه فكرنى لما اتكلمت انا وانتى عليها
    قدر الواحد لازم يعيشه وبالتالى هيتعايش معاه غصب عن عينه
    قدر لازم يوصل بيه للاحسن ويخرج منه زى ما هو او احسن من قبل كده كمان
    من الاخر
    انا بحب كلامك :*

    ردحذف
  13. الله الله يادندن
    بتقطعى عليا بفكره انى جميله
    طيب انتى عارفه تواضعى مش هتنازل باقل من بوست عنوانه علي فكرة علي فكرة رونا جميله علي فكرة ههههههههههههههههه متواضعه طول عمرى ^_^

    بجد انا بحب فيكوا (وانتى عارفه مين فيكوا) التفنيد والتفحيص والمناقشات دى بنبسط وبستفاد بيها اوى :)

    مبسوطه انه عجبك بجد :)
    وانا <3<3 كتييير

    ردحذف
  14. ههههههههههههه

    امتحانات ايه اللى نحمل همها
    صلى على النبى
    زيدى النبى صلاه

    انا كنت بحلم قصدى اهلى كانوا بيحلموا بهندسة و لما قلشت الهندسة كل الكليات اتساةت
    مفتكرش مرة كنت بحمل هم الامتحان كنت بروح الكلية عشان اقابل صحابى لكن المحاضرة كنت بحاول افهم
    المذاكرة بين المادة و المادة بعد ما نشوف الدكتور حذف ايه
    ساعات كنت بجيب تقدير كله بتاع ربنا
    مرة جى وقت الامتحان مع ماتش للاهلى اقعدت اسب و العن الناس اللى مش بتفهم و حاطين امتحان فى ميعاد الماتش ساعتها الشيطان لعب فى دماغى جامد لكن الحمد لله قلت اعوذ بالله من الشيطان الرجيم و رحت الماتش الامتحان فيه دور ثانى
    و بعدين حد يعمل فى نفسه كده حقوق حقوق حد يخش حقوق برجليه
    هههههههه
    على فكرة كلية الحقوق فى الاربعينات و الخمسينات كانت بتاخذ مجاميع اعلى من الطب و الهندسة و كانت بتخرج الوزراء
    يالله بنسيطك اهو

    تحياتى

    ردحذف
  15. ربنا ادي قدرة للانسان بانه يقدر يحقق حاجات كتير بس لازم يكون عنده الاصرار والعزيمة
    تحياتي ليك ولافكارك

    ردحذف
  16. أولا ملاحظة من طريقة الكلام أنها بدأت يبقى فيها اصلا
    ثانيا ملاحظة من طريقة الرد أن بقى فيها التواضع الزائد الى موجود عندى
    ثالثا البوست كان حلو أوى وعاجبنى لحد نقطة معينة عملت فيها كده :| أعتقد أنتى عارفة ايه النقطة دى
    رابعا أنا مش بشبع من كلامك :)

    ردحذف
  17. همممممممم
    ايه دا يابنوووتة
    البوست دا هايل هايل هايل هايل ..................................................................................................... هايل ،، الخ :))))))

    بصي بقي
    انا لحد ماخلصت ثانوي
    كان في حاجة فيا غريبة
    جايز لاني كنت بحب المذاكرة زيادة عن اللزوم
    مكنتش بقبل اكون في المركز التاني ابدا
    دايما الاولي
    الاولي ع الفصل
    الاولي في قرايبي
    الاولي في المكانة عموما والمسئولية

    كنت انا اللي شايلة مسئولية نفسي برده
    انا اللي بذاكر لنفسي
    مأخدتش الدروس الا في 2 ثانوي
    وعلي مضض
    مكنتش عايزة اخد
    بس انا حسيت اني مروحش المدرسة واخد الدروس افضل بصراحة :))
    المدرسة مكانش ليها لازمة
    بالذات ان بدأ فشلي في ثانوي
    تزويغ بقي وشقاوة ههههههههههه
    كنت بزوغ واقعد في مخزن الكتب واذاكر وارجع في نص الحصة اللي بعدها اتطرد وارجع تاني المخزن او اوضة الموسيقي او قاعة الرسم اقضيها مزاكرة او استمتاع بالفن :)
    واحيانا في المكتبة بقرأ :)

    ايام لامتحانات بقي
    كانت مذاكرتي قليلة جدا
    لكن نتيجتي قوية جداً
    كنت وركزي في كنت دي
    بعرف اركز اوي في فترة قليلة اوي
    كنت وبرده خدي بالك من كنت دي ههههههه
    كنت بعرف افهمها وهي طايرة
    والحمدلله
    نجحت في ثانوية عامة بمجموع تقريبا 94,6 % ودخلت بيهم اثار مع ان مجموعي كان يجيب ألسن ودي خيبتي في كتابة التنسيق
    هممم
    من هنا ابتدا الفشل
    هههههههههههه
    مكنتش بذاكر تقريبا
    مكنتش بحضر تقريبا
    ابتديت احب البيت اوي لدرجة اني كنت بنزل الجامعة كل شهر ولا حاجة
    والامتحانات بنقي من الكتاب وبلغي اللي ع مزاجي وبذاكر اللي علي مزاجي
    انتهي كل دا باني شلت مادتين اول سنة :D
    وفي التانية جبت جيد جدا لاني شديت شوية
    طبعا من الصدمة اني ازاى اللي مكنتش بارضي الا بالمركز الاول بقيت في اواخر الصف !!
    تالتة بقي جبت جيد بس
    ورابعة جيد مرتفع
    والحمدلله اتخرجت بتقدير جيد وبحمد ربنااني اتخرجت ع خير
    ودخلت تمهيدي ماجستير وفشلت فيها فشل ذريع
    وقررت ارجع للبيت تاني
    ماليش غيره هههههههههههه
    بس الفكرة اني كنت بتعب اوي ايام الامتحانات
    بس فعلا بحس باستمتاع جامد جدا لما بخلص امتحانات وبحل فيه كويس
    او لما بركز علي نقط معينة والاقيها تيجي
    وسبحان الله اخر يوم امتحانات دا بيكون احلي يوم سواء في تجمع الاصحاب او الاحتفال بنهاية الامتحانات او الاحساس بالراحة اني هروح مش هلاقي حاجة اعملها
    حيحححححححح
    فكرتيني باللذي مضي
    وخلتيني ارغي كتير :D
    بس حقيقي البوست لذيذ اوي وحبيته اوي اوي اوي

    ردحذف
  18. ذكرياتك جميلة اوى بتفكرنى بنفسى مع إنى لسه فى أول الطريق يا مســـهل.
    تقبلى مرورى وتحياتى

    ردحذف
  19. مسآء الفل

    دخلت ولكنى والحمد لله خلصنآ إختبآرآت

    ورغم إنهآ السنه الأخيره لى بالكليه

    أحب المذآكره جدآآآ ولكنى حبيتهآ على كُبر هخخخخ

    بوست مميز يآ رنآ

    ومتآبعه لكِ دومآ بإذن الرحمن

    ردحذف
  20. رونا عامله ايه يا قمر وحشاني
    ايه الكلام الجامد ده
    والبوستات اللي ملهاش حل
    تسلمي يا قمر

    ردحذف
  21. بصى يا رونى يا حبيبتى
    لنظرة المتفائلة دى هتنفع بعد ما تخلصى دراسة لكن فى وقت الزنقة لو حد عنده امتحان وقرا الكلام هيضربك
    هههههههههههههههههههههه

    فكرتينى بايام الدراسة اول يوم فى حياتى اشرب قهوة كان ليله امتحان المديسنال واكتشفت يومها انى الكائن الوحيد اللى بيشرب قهوة وينام:)

    ردحذف
  22. رنا

    اولا بقدم اعتذارى على تأخيرى
    لأن ده بوست اسبيشيال اوى بالنسبالى
    بس والله النت فاصل عندى وكمان انتى عارفة ان عندى امتحانات

    انا سعيد جدا بافكارك وتفاؤلك والطاقات الجميلة اللى هنا
    كلامى مزودش حاجة على كلامك
    لكن زى ما قلتلك قبل كده ده شرف ليا
    ودى حاجة جميلة بشكرك عليها

    نخش فى صلب الموضوع
    الامتحانات تعنيلى اختبارات الحياة
    ازاى الانسان بيخوض فى حياته كل يوم اختبار وتحدى
    وازاى يتعامل معاه
    كلامى بيأكد على كلامك
    لأن فعلا كل لحظة فى حياة الانسان ليها معنى
    وكل يوم فيه هدف
    والحياة فى مجملها لازم يكون فيها رسالة او قضية او طموح او كل ده فى وقت واحد

    شكرا يا رنا على افكارك
    وشكرا ان كلامى فى مدونتك
    وشكرا على المعانى اللى بتقدميها فى كلماتك

    ردحذف
  23. التوتر موجود لكن كل انسان على قد احساسه وشعوره بالمسئوليه
    لكن لابد ان نعترف ان التوتر بيكون موجود بين البنات والشباب كمان ولكن على شان الولاد رجاله فقلبهم بيكون قوى جبتين من البنات
    تحياتى لموضوع شيق وراقى
    تحياتى ابوداود

    ردحذف
  24. لا لا كلام عالى أوى يعنى ... :)
    أدينى دخلت اهوه تانى عشان ما اتضربش :D

    ردحذف
  25. كلامك حلو أوي يارونا
    وعجبتني النظرة دي للأمتحان
    و وقت لما دخلتي كلية الحقوق
    وبعدين بدأتي تتعاملي معاها وتحبيها
    دي فيها فكرة أن الواحد المفروض فعلاً يتعامل مع أي ظروف هو فيها .

    هو عندي المشكلة بتبقى فى حاجة تانية
    إنك تكوني مذاكرة وواثقة بقى
    تلاقي النتيجة فى الأخر غير متوقعة :d
    بس بجد أنا مؤمنة أن كل واحد بياخد ع أد مجهوده بالظبط بجد :)

    ردحذف
  26. استاذ ابراهيم

    بعتذر علي التاخير نظرآ لدور اللى ماشي دة واصبنا جمييعآ :)

    يافندم امتحانات ايه اللى حضرتك تخاف منها دة الامتحانات هى اللى المفترض تتوتر من حضرتك هههههههههههههههههههه

    انا مرة حصل موضوع الماتش دة معايا في ثانوى وامتحان رياضه بكرة وقعد اشجع واتفرج علي الماتش بالتحليل بتاعه كمان مش لازم اشجع فريقي يا ناس ههههههههههههه

    انا عارفه ايه اللى رمانى علي حقوق ما بتوع اداب كانو ناس اخر جمال وشياكه مالهم دوال

    هههههههههههه ايوة كدة سيطلى شكرآ
    علي فكرة علي ايامى خدت من اواخر ال السبعينات والسنه اللى بعدها اوائل التمنينات احنا متسيطين اهو :))

    نورتنى كالعاده
    بس اعتقد دايما انتوا كدة الامتحانات بالنسبه ليكم لعب كورة ههههههههههههه

    ردحذف
  27. محمد
    دة حقيقي وكل واحد علي قدرته وقوته

    نورتنى :)

    ردحذف
  28. مهجتى مهوتى :))

    ههههههههههههههههه العدوى انتشرت بقي

    يا بنتى لازم نتعدى انا طول الوقت بكلمك وتكلمينى لازم نتعدى طبعا

    بس افتكرى في فرق بين التواضع والثقه والحقيقه المتحققه بالفعل ودة كان في بوستى حقيقه :))

    بالنسبه لنقطه اللى فضلتى فيها كده انتى خلتينى ارجع ابص للبوست تانى وكنت هقراه علشان اعرف بس عينى جات علي حاجه خلتنى افهم انى نقطه هههههههههههههههههههه يا سوسه

    وانتى اللى كلامك ميتشبعش منه بيجد :))

    نورتينى

    ردحذف
  29. ريمووو
    ايوة كدة اموت في التفاصيل والرغي

    انا كنت في تانيه ثانوى بزوغ برضه دى السنه الوحيده اللى عملت فيها مجهود تزويغي رهيب علشان اذاكر للدورس وكنت بستغل فعلا التزويغ في المذاكرة

    مع ذلك مجبتش مجموع كبير اوى كنت 82 وشويه بقي بس حمد ربنا
    قومت في تالته نزلت عنهم :))

    الكليه كانت متعتى الوحيده ومكنتش بعمل حاجه غير راحه الكليه راجعه من الكليه في المحاضرة خلصت محاضرة ههههههههههههههه كنت رهيبه :))

    عكسك في دى انا :))

    عجبنى نظام مرة ومرة
    وبصرة اتنا كمان اتخرجت بجيد بس كان ممكن اجيب اكتر من كدة
    ربنا يسامح بقي :))

    ياحوبي ارغي براحتك
    بيجد استمتعت وانا بقرأ كلامك باسلوبك اللذيذ دة :))

    نورتنينى كالعاده وانتى اللى كلامك هايل يا ريمو يا بيتوتيه :))

    ردحذف
  30. حبيبه

    نورتينى بالفعل وانا تقبلتهم من قبل اى شئ ياقمر

    ربنا يوفقك في بدايه طريقك بس مش هقولك الجمله المستفزة بتاعت شدى حيلك
    بس هقولك اجتهدى اوى علشان تعملى اللى تقدري عليه ومتندميش في الاخر وتحسي ان كان ممكن تعملى اكتر من كدة وتجيبي حاجه احسن من المجموع اللى جيبتى

    وربنا يوفقك وينورلك طريقك :)

    ردحذف
  31. ترانيل

    مساء السعاده :))

    نورتينى لاول مرة بيجد

    الحمد الله انك خلصتى وبالتوفيق ان شاء الله

    وبأذن الله انا كمان هتابعك

    طيب شهاده اهو يا ناس في حد بيحب المذاكرة بتاعت الجامعه :))

    ردحذف
  32. اسلام

    متعتذرش علي إيه عادى جدآ
    المهم طمنا عملت ايه في الامتحانات؟؟

    لاشكر علي واجب
    وبعدين شعرك هو اللى جميل يشجع الواحد علي سرقته يعنى وضميرة مستريح :))

    بالنسبه للامتحانات بالنسبه ليك
    جميل اوى انك شوفتها كاختبارات حياه واحنا بنعدي واحد تلو الاخر

    مرة تانيه انا اسعد بوجود كلماتك في مدونتى ;)

    نورتنى كالعاده :)

    ردحذف
  33. ريري

    انتى وحشانى اكتر
    شوفتى بقي بقالك كتير غايبه عن بوستاتى ازاى وبوستاتى مفتقداكى بيجد
    ومدونتتى وانا كمان

    وحشتينى جدآ ونورتنيى كالعاده
    وربنا يخليكى ليا ويخليلي تشجيعك دة

    ردحذف
  34. بصي يا ريماس
    اخدها من تحت لفوق

    القهوة دى انا بشربها وانا عندى 6 سنين

    يعنى بعد سنتين بقيت فعلا بشربها وانام ههههههههههه

    بالنسبه لكلامى انا عارفه كتير هيقولوا كدة والله
    بس انا قولت ابعدوا عن الفكرة العامه للامتحانات كامتحانات دراسه
    معلشي مع احترامى للتعليم بتاعنا الامتحانات دى متثبتش غير اننا متخلفين

    انما انا كنت عايزانا نبص ليها كحاجه بنعديها في الاخر ونبص للامتحانات اليوميه والابتلاءات والكلام دة :))
    وبس ياستى

    نورتينى كالعاده يا ريمو
    بالنسبه للضرب لو انتى اللى هتضربي فضرب الحبيب زى .........
    :):)

    ردحذف
  35. استاذ ابو داود

    اوة هو القلب الجامد دة يشيل مادة زى ميشلش قله اوى المجتهدين اللى بيفرق معاهم

    ماهو دة علشان سياسه الاسرة مع الولد انه ميفرقش معاهم طالما انه ولد وراجل وهيعرف يعتمد علي نفسه

    نورتنى بجد :)

    ردحذف
  36. سوكتى :)
    من امتى وانا كلامى مش عالي يابنت

    اومال انا بطولك ازاى هههههههههه

    بالنسبه للجمله التانيه اسحبيها احسلك
    ههههههههههههههه

    مبسوطه انا بغض النظر عن اى شئ مبسوطه
    انك عرفتينى انك قريتى البوست عمومآ :))

    ردحذف
  37. ندود

    بحب تحليلك بيجد للي بتقرأى عمومآ

    بالنسبه للمجهود
    احيانا فعلآ ممكن تعملى مجهود جبار بس تتغابي في الامتحان عادى جدآ
    او تحصل حاجه في يوم الامتحان توترك وتضايقك وتضيع المذاكرة

    واحيانا ميحصلش اى شئ من دة بس النتيجه تظلمك
    هنا بيبقي نوع من اراده ربنا وقدرة اللي قاسمه ليكى

    ربنا معاكى دايمآ وتكونى ناجحه بتفوق باذن الله دائمآ :))

    نورتينى اوى بيجد <3

    ردحذف
  38. صباح الخير عليا

    معلش جاى متأخر

    بتاع تلت اشهر ولا حاجه
    هههههههههههههههههههههههههه

    كلامك مثالى

    بس انا مش عارف اعلق عليه

    لانى بقول المثاليه متتحققش

    بس بسال نفسى ايه المانع طالما احنا مثاليين فى الخطأ وبنعمله بزمه كده

    ما نبقى مثاليين برضو فى الصح اللى بنقول انه مش هيتحقق

    التعليم ده قضيه كبيره قوى

    وعشان تقنعى ناس يبقوا متعلمينن ويقتنعوا ان الامتحان مش انتقام منهم

    يبقى اقنعى الدكاتره انهم مينتقموش فعلا م الطلبه

    ويبقى فرحان وهو بيسقط الناس

    دى مش فكره لام كبير ومؤسسه كامله

    دى فكره تاثير على نفسيات الناس دى كلها

    وبرضو صباح الخير

    ردحذف
  39. مساء الفل يا زناتى :)

    انت متاخرتش انا حاسه كأن اخر موضوع كان البارح وان ليسه مش مسئوله لو مدونتك اخلقها فسدت في الفترة دى :))

    عندك حق فكرى مثالي لانى انا مثاليا في تفكيري وبحاول اوصل لكدة دايمآ
    علشان كدة بعانى :)

    موضوع الدكاترة هو يمكن بيفتكر انه مبيطلعش حقده علينا هو يمكن بيبقي فاكر انه بيحاول يخلينا نذاكر احسن
    او يختبر ذكائنا

    بس بمناسبه الدكاترة كان في دكتور بيموت يلغي ويجيب من الملغي ويعمل كدة في كل دفعه وكل دفعه يضحك عليها باسلوبه هههههههههه كان دكتور دمه ظريف هههههههههه


    يلا خير خليها علينا برضوا يامحمد :)

    وبرضوا مساء الفل ونضيف الروقان كمان ^_^

    ردحذف
  40. حلو كلامك ياورنا :)

    عارفه انا كمان مكنتش بحب اندم ولا اعيط ولا كل البتنجان ده .. اللى اتحل اتحل وخلاص هوجع دماغى ليه واراجه واقعد اعض صوابعى انى مركزتش وانا بحل

    وعارفه كمان .. انا من النوع اللى ممكن مااذاكرش طول السنه واجى ف اخر ايام واركز فتلاقينى بقيت من الاوائل ... دايما كنت كده .. لكن طبعا ف الكليه مكنش ف دماغى اوى المذاكره وكنت بفتح المواد ايام الامتحانات وعدددددددددددت ...

    جميل موضوعك يارونا وجميله مدونتك اول مره اجى هنا احجزيلى كرسى بقى ف الركن اللى هناك ده عشان هاجى ع طول ^__^

    ردحذف
  41. يوضع الامتحان لفرض الهيبة والرهبة..

    سألوا احد قادة الحرب الاوروبيين (اعتقد نابليون) عما يخيفه.. فاجاب الامتحان!!
    مش متاكد نابليون او غيره.. اسألوه :)

    تحية ومودة

    ردحذف
  42. سعدت بالمرور من هنا

    و راق لي جمالية الاسلوب و طرافة الطرح


    منجي / الزمن الجميل

    ردحذف
  43. دعاء

    ايوة بتنجان ومحشي وكدة ههههههههههههههه

    انا عارفه النوع دة بس ابعدى بقي علشان النوع دة كان بيخنقنى جدآ هههههههههههههههههههههههههههه
    بس دة ذكاء علي فكرة يعنى


    الكرسي ياقمر اتحجز باول طاله ليكى هنا وانا كمان رايحه عندك وابقيت مشتركه اهو يلا حاجه ساقعه بقي لو سمحتى ^_^

    ردحذف
  44. gmr14 :)

    فعلا هي بتتفرض ساعتها اوى يعنى ههههههههههههههههه

    بالنسبه لمقوله نابليون هو قال
    عندما يأتي الامتحان يتمنى المرء أن يخوض معركة على أن يخوض امتحان

    يعنى حاجه شبهه اللي حضرتك قلتها كدة :))

    يمكن يكون بقي السؤال دة كان لحد تانى ههههههه نسئله برضوا يعنى

    نورتنى :)

    ردحذف
  45. استاذ منجى

    وانا سعدت بها المرور وبراي حضرتك جدآ

    نورتنى :)

    ردحذف
  46. غير معرف7:58 م

    السلام عليكم و رحمة الله و بركاته ’ أما بعد أردة أن أدعوكم لزيارة مدونة الأمل و اعطائي رأيكم فيها بكل صراحة و ترك بصمتكم الغالية على قلبي في المدونة و سوف أكون شاكرا لكم جزيل الشكر .

    في انتضار زيارتكم تقيلو مني فائق الاحترام و التقدير

    ردحذف
  47. تذكرينا بايام عندما نتذكرها نبتسم لانها لا تاتى مره اخرى
    ايامك جميله مثل كلماتك الاجمل والاروع
    تمنياتى لكى بالسعاده الدائمه
    تحياتى ابوداود

    ردحذف
  48. ربنا يسعدك يارب
    بجد انتى عسوله وسكرة
    وبموت فيكى

    ردحذف
  49. استاذ ابو داود

    شكرآ كتير جدآ
    :):) لكلامك التشجيعى دة

    ردحذف
  50. ايناس القمر عندنا ياهلا ياهلا

    ويسعدك انتى كمان يا اينو
    ويخليكى ليا
    الكلام دة كتير اوى
    طيب يلا عاكسينى وضافيني فيس بقي ^_^

    ردحذف