2012-01-16

نور عنيهم اغلي منى






اول مره اشوف بابا بيعيط فيها في حياتى كلها كانت النهارده

 ...كان بيتفرج على برنامج جابر القرموطى . على اون تى فى 
وكان جايب البطل رضا عبد العزيز
اللي فقد عينه في احداث شارع محمد محمود
......................
حسيت ان عياطه مش حزن على الولد ده
بس انا حاسين ان فيهم ضعف جامد اوى
   ..وقله حيله

حسيت انى نفسى البس واجرى ع التحري
عارفه ان محدش هناك بس نفسي افضل موجوده
ان شا الله لوحدى  لغايه
ما الثورة ترجع علي التحرير
ومش تخرج منه غير وهى ناجحه ان شاء الله
.............................

وحق كل دمعه حزن نزلت
وحق كل نقطه دم سالت
وحق كل عرض انتهك
باقسم بربي من دلوقتى
انى هضحى بروحى علشان الحاجات دى
ماتروحش هدر وحق الناس دى ميضعش

..وربنا شاهد ع الى بقولوا .
..سنفقد ارواحنا قبل ان نفقد ما صنعناه ف 25 يناير.. موعدنا 25 يناير



دى اول صورة ليا في دون بالصورة بس اللى تحتها مش كلامى 
اول صورة شدتنى اعبر عن اللى فيها
ملقتش احسن من اللى كاتبه صحبتى انجى صالح الدين
من البنات الجدعين الثورين بجد
متعرفش حاجات كتير بس  عارفه معنى الثورة وبتحب مصر جدآ
مش شاعره ولا كاتبه ولا ليها صفحه ولا اى حاجه
بس كانت احسن منى في التعبير واحسن من ناس كتير في الشعور
والشجاعه والجرأة

:( اعبر انا كمان واحاول اقول اللى جوايا

في ناس كتير بيطلبوا منك تكون عادى
تكون جبله بمعنى ادق

تشوف الموت ومدمعش
تشوف السحل ومتصرخش
تشوف حقك بيضيع ومتثورش

تحس كرامتك بضيع ومتعبرش
كبريائك بيحطموة وشرفك بيقطعو
ومطلوب منك متتحركش
تفضل ساكت ومغيب ومتنزلش
وتيجى تتكلم  يقولو لك 
اياك تعبر او تشوح
اياك تفكر حتى تعترض وتلوح
وحقك سيبه يروح وروح
احسلك 
مطلوب انك تكون انسان طبيعي
في وسط كل اللى بيحصل اوعاك تثور
اوعاك تقول رايك 
او تفكر تكون غيور علي بلدك
اوعاك تكون انت اوعاك تكون هما
اوعاك تكونوا كلكم عايزين تعبروا عن رايكم
اوعاك تفكر او تستفسر او حتى تحاول تتشرط
اوعاك واياك ومنهى عن اى فعل يمكن لو فكرت تفكر
احنا هنعرف وهتتمسك يا شاطر
ويمكن يتعملك محضر

__________________________________________


يمكن كتير يصعب علينا حال اللى فقدوا عنيهم
بس هما احسن منى ومنك هما فقدوها وضحوا بيها
مش لجل احنا نشوف لجل نتعلم منهم معنى التضحيه باعز ما تملك
كتير بحسهم شايفين احسن مننا
والامور عندهم اوضح مننا 
هما مش في محنه هما في منحه من ربنا
بيزيد فيها كل شئ ايمانهم بي وصدقهم في حب بلدهم
هما حقيقي فقدوا بصرهم بس بالنسبه لينا مفتحين عننا
بالنسبه لينا هما الاسود واحنا الفئران في عششنا وبيوتنا وارضنا

دوس هنا

وهنا







اضغط

هناك 27 تعليقًا:

  1. وحق كل دمعه حزن نزلت
    وحق كل نقطه دم سالت
    وحق كل عرض انتهك
    باقسم بربي من دلوقتى
    انى هضحى بروحى علشان الحاجات دى
    ماتروحش هدر وحق الناس دى ميضعش
    >>
    الله الله بقا عالحماس :)
    عحبتني جداااا
    وان شاء الله محدش فينا ناوي يضيع حقه والثورة مستمرة حتي النصر ~

    ردحذف
  2. Nelly Aly اولا خلينى اشكرك على كلمة كاتبها فى البوست انتى وصحبتك لانه بتتكلم عن حقيقة ممزوجه بواقع يوجع القلب ان الناس دى مخدتش حقها فى المقابل عم حسنى مبارك متكرم اخر حاجه بدرنج بتاعه

    Nelly Aly لكن ان احنا فئران مين احنا مينفعش نجمع لأن فى ناس منا بيعمل خير للناس المحتاجه وبيساعدهم يمكن مش فى العلن ممكن فى السر بس انا شايفه ان حب الوطن مش بيتمثل فى انى اموت وبس, لو مش هقدر انزل التحرير ممكن اخدم اهلى واساعدهم, شايفة الفئران تطلق على امثال توفيق عكاشه واللى بيشتمو فى الثورة

    ردحذف
  3. الحماس دة حماس صحبتى اللي بفتخر بيها

    نورتينى والثورة مستمرة حتى النهايه

    ان شاء الله ^_^

    ردحذف
  4. نيللي

    العفو علي إيه ياقمر :)

    بصي يا نيللي التشبيه دة بتاع الفئران

    انا ممكن كنت اقول البعض

    وفعلا عندك حق ناس كتير ممكن تشاكر بالدعاء بالعلاج بالدفاع

    بس كان قصدى ابينا قدام اللى فقدوا نور عينيهم بالشكل الضعيف دة حتى لو كنا بنعمل شئ منجيش حاجه جنبهم ومتساويش المهم وجروحهم وفقدهم لاعز ما يملكوا :(

    ردحذف
  5. صباحك غاردينيا روناء
    وماأجملهم وأروع مايقدمون للوطن
    وماأجمل كلماتك وماأدفئ دموع والدك
    تلك هي المشاعر الحقيقية للوطن
    فـ يستحق نبضنا ودموعنا وأرواحنا
    حفظ الله مصر الحبيبة وحفظ لكِ والدكِ
    لاحرمكِ الله دفئ أحضانه "
    ؛؛
    ؛
    لروحك عبق الغاردينيا
    كانت هنا
    reemaas

    ردحذف
  6. صوره تغنى عن الكلام ولكن الكلمات اضافت وعبرت عن ما بداخلنا بصدق وضغطت بها على الجرح والالم الذى يعتصرنا
    تحياتى لك ولصديقتك حقيقى بوست لعجبنى لانه يحمل مشاعر صادقه جدااا

    ردحذف
  7. تحياتي ليكي و صديقتك على الكلام ده قد ما حمسني قد ما وجعني اوي قد ايه فيه ناس مش حاسة بحاجة ولا حاسة بمعاناة و تضحية كل اللي نزلوا و اتصابوا و استشهدوا و مستهونين بكل حاجة و يرموهم باتهامات باطلة يعني لا منهم و لا كفاية شرهم
    يارب احمي مصر و نجيها
    واحفظ ولادها و بارك فيهم
    يارب
    تحياتي ليكي

    ردحذف
  8. عندك حق فى كل اللى قلتيه

    انا واحد من الناس حاسس انى فاشل وطنيا

    البطل رضا عبد العزيز والبطل احمد حرارة والشيخ الشهيد عماد عفت والبنات اللى بتتسحل

    هما دول احنا بس مش احنا دلوقتى احنا اللى نفسنا نكونه

    انا نفسى حتى لو مقدرناش نكون زيهم
    كلنا نحاول نساعدهم

    لسه لحد دلوقتى فى ناس بتهاجم الثوار والشهداء والمصابين وكأن على رأيهم كل ده فوتوشوب

    الوطنية مش بالفلوس والمصالح
    الوطنية بالاخوة وقلبنا يكون على بعض

    معرفش ليه رغيت كتير بس كلامك جواه كلام كتير اوى وتصرفات وايمان بحاجات كتيرة اوى

    ردحذف
  9. وما اسوأ قلة الحيلة !!
    احساس غاية فى الالم مريت بيه كتير جداااا لما بابا منعنى من نزول التحرير!

    احيى صحبتك على كلماتها ! حرقت دمى اكتر ماهو محروق :)) !

    الا إن نصر الله لقريب

    ردحذف
  10. ياسلام عليكى انتى وصاحبتك يا رنا
    فعلا كل ما الواحد بيشوف الشباب اللى زى دول بيحزن اوى
    بس الحريه مش بتيجى بسهوله ولا ببلاش لازم ليها تضحيات كتير عشان نحس بيها بجد فى الاخر
    الحاجات الصعبه والمهمه مش بتيجى سهل

    ردحذف
  11. كلنا بنحس بقلة الحيلة والضعف واننا عاجزين مش قادرين نعمل حاجة مع ان في ايدنا كتير
    يارب ياارب الثورة تنجح المرة دي بقي
    كفاية شهداء
    كفاية مصابين
    كفاية ظلم
    كفاية استبداد تحت اسم الطمع !

    البوست دا خلاني ادمع بجد
    كلام صاحبة الصورة وجع قلبي كمان
    وتعليقك خلاني ادمع اكتر

    يارب خليك مع مصر يارب

    ملحوظة ..
    لينك الصورة انتي حطاه لينك الايفنت مش لينك الصورة :)

    ردحذف
  12. رنا

    مش عايزك تزعلي من تعليقي

    الشهداء دول فوق دماغنا

    والمصابين ايض فوق دماغنا

    بس بما اني عارفك عقلانية

    فلازم تفهمي ان البلاد مابتتبنيش بالعواطف

    الشهيد ياخد حقه يوم ماتقوم البلد دي وتقف علي رجليها

    علي فكرة

    انا مؤيد جدا لثورة يناير

    ومش مؤيد للضوضاء اللي بعدها

    ردحذف
  13. مساء الفل والبهجه ريماس

    عندك حق في كلمه غاليتى

    لكن تعديل بسيط هذا والد صديقتى

    وليس والدى

    اشكرك علي المرور الرائع والمبهج لي دائمآ ^_^

    ردحذف
  14. استاذه هبه

    ربنا يخيلكى دة كانت طالعه من جوة اوى
    ولايسعنا الا الكتابه :)

    اسعدنى تواجدك :)

    ردحذف
  15. افكار
    للاسف احنا مضطرين كل يوم ندخل في نقاش خربتوا البلد

    ونقاش الثورة عملت إيه
    وكانهم مش شيافين الظلم اللى بيتعرض لي الشباب دة

    معلش مضطرين نستحمل الي ان تكمل ثورتنا علي خير :)

    اسعدنى تواجدك :)

    ردحذف
  16. اسلام

    والله كلامك هو اللي في الجون يعنى

    براحتك انا هنا ديمقراطيه جدآآ

    ومحبذه للرغي ^_^

    اسعدنى تواجدك
    وربنا معاك في الامتحانات :)

    ردحذف
  17. نيللي :):)
    كلنا نشعر بقله الحيله
    قدام بنات زى صحبتى دى بجد بحس بضعفي
    وقهري فعلا وبحس بنوع من العادات القديمه بتاعت البنت في البيت والولد هو في الشارع مبقولش نتساوى في كل حاجه بس ننزل نشوف بعنينا ولو مرة علي الاقل

    لنا الله يا نيللي ون نصر الله لقريب باذن الله :)
    اسعدنى تواجدك :)

    ردحذف
  18. دينا :)
    ياسلام عليكى انتى يا دينا وتكملتك كدة بالكلام

    كلامك صح اوى لازم نتعب اوى علشان نحس بقيمه اللي في ايدينا واللي هيكون في ايدينا بعد كدة

    نورتينى واسعدينى كالعاده يا دندن

    ردحذف
  19. ريمو

    اولا ربنا يبعد الحزن عنا جميعا وتزول كل دمعه ويطيب كل جرح قريبآ باذن الله

    الصورة من اختياري كنت واقفه قدامها مش عارفه ابدأ منين لقيت صحبتى دى منزله علي الوال الكلام دة خدته ظبطه وكملت عليه من وراها سرقتها وبعدين قولت ليها :))

    بتشكركم كتير علي كلامكم يعنى
    هى بطلع الكلام من غير ما تحس بطلعه بحماس غير عادى لانها كدة فعلا حماسيه جدآ :)

    ان شاء الله الصورة اللى جايه تبقي فيها فرح بقي :):)

    نورتينى ريمو بيجد

    ردحذف
  20. سواح :)

    ربنا ما يجبيب زعل ابدآ

    السؤال البلد دى هتقف امتى علي رجليها ونجيب حقهم مش هيحصل غير لما نمر بشويه فوضي علي ضوضاء كدة علشان الرؤيه بعدهم توضح
    مافيش ثورة بتيجى ونتائجها مضمونه
    بس في شعب مصمصم وشباب متحمس مصمم يكمل للاخر وهو دة الفرق بينهم وبينى وبين اى حد تانى مش قادر يكون مضحى اوى كدة زيهم


    بالنسبه للعواطف مافيش حاجه بتقوم بيها احنا بس بنحاول نعبر وبكرة نقدر نغير ويجى الوقت اللى نقدر نفيد البلد دى ونبنيها صح

    نورتنى وانا مش زعلانه خالص مالص من تعليق حضرتك :)

    ردحذف
  21. الشباب اللى اتصاب فى الثورة واللى ضحى بنفسه علشان بلده .. كل ما بشوفه بتوجع أوووووووى :(
    ربنا يصبرهم ياااااارب

    يـــارب تكمل على خيــر وترجع لكل الناس حقوقها

    بصراحة مافيش كلام يتقال بعد اللى انتى قلتيه .. تسلم إيدك إنتى وصاحبتك
    جيتوا على الجرح :(

    ردحذف
  22. ايمان :)

    فعلا حاجه توجع اوى كمان

    يسلم وجودك انتى ياقمر :)

    ردحذف
  23. كتير بحسهم شايفين احسن مننا
    والامور عندهم اوضح مننا
    هما مش في محنه هما في منحه من ربنا

    ..
    نفس الاحساس بجد
    وصح طبعا ..
    عجبتني بجد و كلامك احساسه عالي وواقعي يا رونا :)

    صحصحت اهو و كملتها كلها ;)

    ردحذف
  24. صدقينى يارونا بحس بصدق كلامك بصدق مشاعرك بصدق وطنيتك
    حاسس ان نزلت النحرير هلقيكى واقفه هناك متتظره بكره لما ييجى وهييجى معاه الخير كله بتواجدك وتواجدامثالك من ابناء مصر الحبيبه
    اد ايه انا فخور ببناتنا اللى عدوا حاجز الانوثه واصبحو رجالا من جنود مصر

    ردحذف
  25. صدقينى يارونا بحس بصدق كلامك بصدق مشاعرك بصدق وطنيتك
    حاسس ان نزلت النحرير هلقيكى واقفه هناك متتظره بكره لما ييجى وهييجى معاه الخير كله بتواجدك وتواجدامثالك من ابناء مصر الحبيبه
    اد ايه انا فخور ببناتنا اللى عدوا حاجز الانوثه واصبحو رجالا من جنود مصر

    ردحذف
  26. ندود <3

    برافوا لاء شاطرة انا نفسي مخدش بالي انى كتبت التلت سطور دوال ^_^

    والله الكلام لما بتقتبسو بينور بيجد :)))))))))
    يسلم ليا متابعتك وانا صحصحت ونزلت الجديد اللينك علي الصفحه الحمد الله انك نبهتينى وانتى مش فايقه كدة هههههههههههههههههه

    امواااه :)

    ردحذف
  27. استاذ فاروق

    والله انا سعيده بكلام حضرتك وكلامى فعلا زى ما حضرتك بتقول نابع من حبي لبلدى وحبي انى اكون زى البنات دوال
    اتمنى فعلا انزل واشارك واعمل اي شئ باي شكل :)

    بيسعدنى تواجد حضرتك دايمآ :)

    ردحذف