2012-02-23

احداثي (2)



احداثي علي مدار الفترة اللى فاتت
وبصدعكم 
نفسي بيجد في فنجان قهوه
وقلم وورقه
وهدوء وراحه
حاجه بقت حلم
الحاجات دى مبقتش 
عارفه احققها الفترة دى
ليه يا رنا
لان باختصار انا مش فاضيه
فعلا ابص لحد همسك ورقه
وقلم واكتب 
ههههههههههههههه
بجد مشحونه بشكل غريب
الغريبب ان الشحن
مش مشاوير وعدم راحه
وحاجات بخلصها
وكورس وامتحان
انا مشحونه نفسيآ كمان
محمله نفسي مسئوليات متخصنيش
ومتفرقش مع حد
بس اعمل ايه انا كدة
وحابه كدة 
 _______________________

حدث مهم اوى حصل من ساعات بوست احداث
1
طنط اللى كلمتنى كتير جات البيت
افتكرت الرقم وجات
لسبب او لاخر مخلتهاش
تتمكن انها تقابل ماما
الموضوع محسوم
والمشاكل متواجده
مش ناقصه كاسفه هى
وكانت دى اخر مرة اشوفها
رغم انها ساكنه قريب مننا
لان باختصار انا مبركزش وانا ماشيه
ومش اجتماعيه في منطقتنا
^_^
_______________________

بقالي فترة
مش متابعه جديدكم
بس انتوا كرما اوى
ومتابعنى
معلش لان الايفينت بتاع
التدوينات القديمه
يدوبك بلحق اقرأ
كل البوستات في بصعوبه
ما بالكم بوستات جديده
فسامحونى
:)
___________________________

جالى البرد تانى
زيارة اخري بشكل مختلف
فعلا حاجه تقرف
مبحبش المرض
ومضطرة اسايره علشان
يهدى ويمشي 
 ^_^
__________________

حتى الان قرأت 
خمس كتب من اللى جيبتهم 
من المعرض
ودة تطور رهيب
محصلشي قبل كدة بالسرعه دى
اشتاتآ شلوت
لاتحسد ولا حاجه
ومازال موضوع عروستى مستمر
:))
_________________________
هوامش علي الجمب

مش كل شخص بنبقي حاسين بي اوى
بيكون عارفنا وحاسس بينا
احيانا بيبقي مستهبل ومش عايز يشوف
اللى كل الناس شايفه

لما تتعب اوى ارفع صوتك للي بتحبهم وقولهم محتاج ليكم
دايما كنت بحس ان دة معناه ان قوتى قلت
بس من يومين حاسيت ان دة مش ضعف هى دى القوه بعنيها

احيانا لما بنمر باحداث كتير
بنحتاج نستفرد بالوحده 
ربما نجد راحتنا بها

انا وبناتيت مدونين من هنا
كنا اتنقشنا كتير في الموت
بعد ما ابراهيم الفقي مات
ووصلنا اننا لازم كل فترة نشير لي حاجه
هو او غيرة من اللى ماتوا وندعلهم
وانا قولت مش هيخلوا بوست ليا
من حاجه لي هو واضفت اليه جلال عامر لحبي ليه
وكمان حاجه لحد متواجد في الحياه معانا

مقولتين ليهم

ابراهيم الفقي

ان لم تهتم بنفسك لن تهتم بالاخرين ولن يهتم بك الاخرون

جلال عامر

 لكننى صعلوك عابر سبيل، ابن الحارة المصرية، ليس لى صاحب، لذلك كما ظهرت فجأة سوف أختفى فجأة، فحاول تفتكرنى

ماما


.انتى زكيه لكن احيانآ بيكون تفكيرك ساذج وطفولى
امى وبترفع من المعنويات 
^_^ 

 

هناك 50 تعليقًا:

  1. الف سلامة من البرد

    جميل جدا انك تكوني مشغولة باشياء كتير

    خمس كتب مرة واجدة

    ربنا يوفقك

    وتكمليهم خمستاشر

    رحم الله جميع اموتنا

    ردحذف
  2. الف مليون سلامة من البرد .. ان شاء الله تقومي تتنططي كده قريب D:

    موضوع الاحساس بالشخص ده صح جدا جدا مش اي حد نحس بيه فعلا بيبقى حاسس بينا

    موضوع اننا نقول للناس اننا محتاجينهم ده مش مع اي حد ... ساعات لو عملنا كده ممكن نتصدم فيهم للأسف بس معاكي انه اكيد مش ضعف

    اما بالنسبة للوحة فدي الطريقة الوحيدة اللي معظمنا وانا اولهم بنلجأ ليها للراحة

    ردحذف
  3. طيب خليكي طفلة زي مانتي
    البراءة و السذاجة عملة نادرة في زمن ده
    متفرطيش فيهم بسهولة
    على فكرة حكاية انتو كرما علشان بتتابعوني و انا مش بتابعكم المبدأ نفسه غلط
    احنا بنيجي هنا علشان نستمتع باللي تكتبيه
    لكن تيجي او متجيش عندنا دي حاجة ترجعلك
    انا مبسوط بفكرة تدويناتك زمان
    تحياتي

    ردحذف
  4. الف سلامة عليكي من البرد
    دائما تعجبني احداثك و بحب اتابعها و على فكرة انا بتابعك مش عشان انتي بتابعيني و لكن عشا بحب كتابتك بحسها من القلب للقلب على طوووووووووووول :)))
    اعجبني جدا اننا ساعات بنلجا للوحدة يمكن نلقى الراحة فيها انا ساعات بعمل كده :)
    تحياتي ليكي يا جميلة

    ردحذف
  5. الف سلامه عليكي وان شاء الله ربنا يوفقك في الكورس والامتحانات ويحققلك كل احلامك يارب
    تحياتي

    ردحذف
  6. سلامتك يا رونى يا حبيبتى ابقى موجودة ويجيلك برد د ده كلام؟


    انا مش عارفه اتفاقيه ابراهيم الفقى دى بس بعملها على الفيس واوعدك هعملها على المدونة

    المشكله بقى لما نروح نقولهم محتاجينكم فيدونا ضهرهم ببقى نفسى اديهم على افاهم الحقيقه

    بتغاظ انا من حكايه معرض الكتاب ده

    ردحذف
  7. "
    لما تتعب اوى ارفع صوتك للي بتحبهم وقولهم محتاج ليكم
    دايما كنت بحس ان دة معناه ان قوتى قلت
    بس من يومين حاسيت ان دة مش ضعف هى دى القوه بعنيها "

    مش بعرف اعمل كده .. عشان كده بتعب بس مش بحب اقول انى تعبانه او اعترف الا لما يفيض بيا اوووى

    " احيانا لما بنمر باحداث كتير
    بنحتاج نستفرد بالوحده
    ربما نجد راحتنا بها "

    ايون .. كل فتره كده بنحتاج لقعده مع النفسسسس عشان نعيد حساباتنا :)

    ........

    " لكننى صعلوك عابر سبيل، ابن الحارة المصرية، ليس لى صاحب، لذلك كما ظهرت فجأة سوف أختفى فجأة، فحاول تفتكرنى "

    لما بفتكر الجمله دى قلبى بيوجعنى اوووى :(

    ........

    " انتى زكيه لكن احيانآ بيكون تفكيرك ساذج وطفولى "

    هو فى احلى من السذاجه والطفولة ؟

    .......

    الف سلامه عليكى ياقمرايه :)

    ردحذف
  8. فترة وهتعدى :)

    كل الأحداث أنا عارفاها
    نيهاهاهاهاههاا
    الهوامش حلوة أوى أوى :)

    أنا أزاى أسمى ميذكرش فالجزء بتاع الموت ده وأنا اصلا الى كنت السبب أنكم تتكلموا فيه ؟؟
    مش عيب كده يا رنا ؟؟
    لازم تعترفى بالجميل
    ههههههههههههههههههه

    واضح أننا هنفضل فنظرهم أطفال على طول :)

    ردحذف
  9. نبتدى من الآخر للأول
    الأمهات هى دى مهمتهم أصلا أحمدى ربنا أنك طلعتى زكية

    جلال عامر وإبراهيم الفقى من أكتر الناس اللى لسه لحد دلوقتى لما بقرالهم حاجة بضايق جدا ربنا يرحمهم

    5 كتب لازم تتحسدى على فكرة حاجة بتحصل كل يوم دى ههههههه

    أنتى أو أحنا فى بتها :)

    صعب تغيرى نفسك ... وأصلا حاجة حلوة أوى أنك تشيلى مسئوليات متخصنيش مدام مش مضايقاكى فى حاجة

    أكتبى دايما حتى لو أى كلام :)

    ردحذف
  10. نسيت ألف سلامة
    :)

    ردحذف
  11. الف سلامه عليكي ان شاء الله القطه السوده...علي فكره حلو اوي انك تنشغلي وتهتمي بحاجه حتي لو متخصكيش عشان هيجي الوقت ايلي غيرك هيعمل معاكي كده وهتبسطي...خدي دوا عشان تبقي كويسه

    ردحذف
  12. نبتدى بالجزء اللى فهمتة من البوست
    مبدئيا كدة الف سلامة عليكى
    ندخل بقى على الاجزاء المبهمة !!
    طنط مين اللى انتى بتقابليها وانتى ماشية دى ؟؟

    ردحذف
  13. الف سلامة عليكي يارنا
    سيبك من كل البوست
    اخر جزئية أثرت فيا اكتر من كل البوست !!!


    ربنا يصلحلك كل احوالك ياقمرايتي <3
    وتفضي وتعملي كل اللي انتي بتحبيه :*

    ردحذف
  14. نبدا من الآخر برضه :)

    هي مامتك سمعت مامتي إزاي ههههه

    بجد حلوه المقولات

    وإن شاء الله أحاول أعمل كده برضه كل بوست

    (نستفرد بالوحده ,,, محتاجاها جدا جدا والله وحاسه برضه ان اليوم كله زحمه قوي مش لاقيه وقت فاضي بجد )

    القوة إننا نقول اننا محتاجينهم
    تصدقي ده صح فعلا بس مش ف كل المواقف
    بالنسبالي على الأقل

    ألف سلامه ع البرد ويارب تخفى بسرعه

    ماشاء الله لقرايه الكتب ,,, عقبالي يارب

    انا مش متابعه حد خالص بقالي فتره طوييييييله ومش بدخل بلوج بتاعي اصلا كمان :)


    بس كده مره تانيه الف سلامه عليكي :)

    ردحذف
  15. حلوة يارونا

    ردحذف
  16. استاذ خالد \ سواح

    الله يسلمك :)

    ايوان اشتاتآ شلوت يارب عقبال ال 20 في الشهر كدة :)

    ربما يرحمنا احنا كمان

    حلو الانشغال بس مش دايمآ بيكون
    مفيد جدآآ

    نورتنى اوى

    ردحذف
  17. نور :))

    من الاخر
    موضوع الوحدة ايوان صح صح برافوا

    موضوع الاهتمام اه عندك حق مش مع اى حد
    مع اللى يقدرنا طبعا

    موضوع الاحساس فعلا الاحساس نعمه :)

    نورتينى جدآ وشرفتينى اوى :))

    ردحذف
  18. استاذ مصطفي

    والله بيجد يعنى دى حاجه حلوة ونادرة كمان الله تعالى اقول الكلام دة لماما بقي
    لحسن كل يوم اقولها مافيش منى اتنين مش بتصدق:))

    عندك حق بس انا بحس برضه بتقصير
    لان بيجد كلكم بتكتبوا حلو اوى
    وانا بحس بالتقصير وببقي مخنوقه لان بسبب انشغالي مش بلحق اقرالكم كله
    :))

    ربنا يخليك شكرآ كتييير كتييير

    نورتنى كالعاده

    ردحذف
  19. الف سلامه عليكى يا حبيبتى
    يارب تكونى احسن

    بحس ان الضغط النفسى اصلا اسوء كتير من ضغط المشاوير او الامتحانات او او

    الواحد لما بيتابع مدونه بيتابع عشان عايز وبيحب يقرأ كلام الشخص ده
    مش عشان الزياره تترد
    وانا بحب اقرأ كلامك اوى :)

    لسه والله كنت بقول لميهو ان فى اليومين دول نشاط غريب عندنا كلنا فى القرايه
    اتمنى ان النشاط ده يدوم ياااارب

    الهوامش اللى على الجنب دى
    ماينفعش تبقى فى الجنب بس على فكره
    دى المفروض تبقى فى الوش كده :D

    كتييير اللى بنحس بيهم مش بيبقوا حاسين بينا اصلا
    بس تحس بقيمه ده لما تلاقى فى ناس بتفكر فيكى بنفس الطريقه وفى نفس الوقت ساعتها بتعرفى ان احساسك مهما كان بيقصر فى اوقات الا انه دايما صح

    لما تقولى لحد انا محتاج ليك دى فعلا قوه
    وعشان كده مش بسهوله بتتقال لانها بتحتاج نفس القوه لما تيجى تقوليها :)

    ردحذف
  20. خليك رايق وانت بتعلق
    محدش واخد منها حاجه
    في النهايه :):):)
    تصدقى اول مره اخد بالى من الجمله دى ولو انى مش رايقه لكن محدش واخد منها حاجه
    اولا حمد لله على السلامه
    ثانيا عجبتنى الهوامش اللى على الجنب وخاصا
    احيانا لما بنمر باحداث كتير
    بنحتاج نستفرد بالوحده
    ربما نجد راحتنا بها
    معاكى حق بنحتاج لاعاده تنظيم تفكيرنا وهدوء داخلى وخارجى
    وكمان برافو عليكى انك بتقرىء كثير
    والف حمد لله على سلامتك مره ثانيه
    باقه ورد لعيونك

    ردحذف
  21. ولو ان البرد مش بيسيب حد فى حاله الا انه لابد من ان يبعد عن رنا كى تمتعنا كما هى دائما مع انى لو برد لا يمكن ان اترك هذا المكان ابدا ههههههههههههه
    الف سلامه رنا وان شاء الله خير
    تحياتى ابوداود

    ردحذف
  22. طيب مش يمكن إنتى مشحونة نفسيا .. لإنك مش بتدى دقايق من وقتك لرنا !
    معلش رغم انشغالك بس لازم تلاقى وقت لنفسك .

    ..
    والبرد دا وحش وحش أوى :(
    يارب تكونى خفيتى وبقيتى تمام :)

    ..
    "لما تتعب اوى ارفع صوتك للي بتحبهم وقولهم محتاج ليكم"

    مش بعمل كدا وعادة مبقتش ألاقيهم يمكن عشان مش بيسمعوا فعلا .. بس مش المفروض !

    ..
    جميلة المقولات دى للعظماء الثلاثة ;)

    ....
    وحشنى وجودى هنا وآسفة على التقصير .. :)

    ردحذف
  23. لا وايه
    بتقولك كلمات من نبع احساسى
    دى قطعه من نبع احساسى
    صفحات من نبع احساسى
    كتب من نبع احساسى
    وها قد بدأ فيصل التريقه
    وقد صرح زناتى انه قرا الكلام ده كله
    وقرر اسفا مستأسفا
    انه يفليه ويعلق عليه بشده

    ردحذف
  24. امممم حلو الموضوع كالعاده ... بس فيه حاجات مبهمه و عندى شوية اسئله بقى .. هبقى اسألهالك لما نتقابل على الميل او فيس تو فيس :D

    ربنا معاكى يا قلبى والف سلامه عليكي :)

    ردحذف
  25. اول حدث ده بيفكرنى بكتابات الناس الجامدين قوى اللى بعد ما بيخلص بضطر اقرا تانى وتالت
    وحصل كده
    قريته تلت مرات
    وفهمت هيه
    اه والله
    بس كالعاده
    التعليق المتوقع
    شايسا عليها

    ___________________________

    احنا متابعينك يا بشمهندس
    جو الى الامام
    جو يا ريكى مارتن جو جو
    _______________________________

    برد
    وزياره
    ده ضيف رخم بشده
    انا لحقته عالباب
    ضربت حبايه كومتريكس
    مكتوب عليه انه تيت وبيطرد البرد ومبيخلهوش يزور
    وعمل الصح معاه
    الواحد مش ناقص عيا
    اتحاد الطلبه ده عاوز مكن بيجرى
    مش بنى ادمين
    ___________________________

    خمس كتب
    انتى كده محسوده
    اه والله
    استغفرى كده واستهدى بالله ومتقريش تانى
    لحسان يجرالك حاجه وانتى بعقلك وكويسه
    وكانت من يومين بتقول بس خلاص
    العمليه هتبوظ عندك وتتكلمى فصحى
    ________________________________

    عروستى

    _________________________

    بتاع ارفع صوتك للى بتحبهم دول
    ممممممممممممممممممممممممممممممم
    انا امتنع عن التصويت
    _____________________________

    الهوامش دى اقول ايه بقى وكده ويا سلام
    بص احنا نفوت حته الناس اللى ماتت والكلامات بتاع المشاعير
    ونخش علطول على الزكاء
    الزكاء بال ذ يا رونه
    ولو فكرتى تغلطى فيها تانى
    مش هيحصل كويس
    وش غضبان
    وبس
    وكده
    ويعنى
    واصلا
    وفعلا
    وبشده
    واحيانا
    وكتبت كومينت طويل دا بشده
    يا سلام
    انتصرت
    هيييييييييييييييه

    ردحذف
  26. مساء الغاردينيا يارونائي
    ماسكه معايا رونائي دي هههههههههههه عارفه اني بحبك اوي وطعمه اوي ومرحه وجميلة امممم بس كفايا كدا احسن تتغري وتبصي لي من فوق هههههههههه والف الحمدلله على سلامتك معليش بقى في الجو دا بنتعب كتير خدي بالك من نفسك وبالنسبة لاحنا كرما عشان بنزورك وانتي مش بتزورينا نعمل ايه بنحبك ياستي بس انتي مش بتحبينا <<< جايه تتخانق ههههههههه لابجد بهزر معاكي عشان احنا بنستمتع بجد وكل انسان وظروفه والله انا بتحايل على الظروف اووي عشان اكون معاكم وبينكم وياستي مستنيينك المهم تكوني بخير ومبسوطة يازكية ههههههههه عجبتني عبارة مامتك فكرتني بست الكل لما تقولي انتي ذكية بس مش عارفة ليه ساعات بيتعطل التفكير عندك هههههههههههههه هو دا يعني غباء مثلا ولا ايه ؟؟ سيبك منهم امهاتنا بيشوفونا بشكل جميل :) "
    ؛؛
    ؛
    على فكرة خليكي دايما طفلة عشان قلوب الاطفال جميلة ونظيفة "
    ؛؛
    ؛
    لروحك عبق الغاردينيا
    كانت هنا
    reemaas

    ردحذف
  27. همه خمسة وخمسة
    خمس كتب فعلا
    :)

    سلامتك من البرد
    وربنا يرحم موتانا وموتي المسلمين

    ردحذف
  28. اوكى
    كمان فرخه مشويه
    والبوست لسه مجاش دوره
    بس ممكن اقولك فى مومينت لو تحب يا بشمهندس
    بس طلعت حاجه ظريفه
    بفكر اعملها علطوللللل
    بس ماشى
    نكتبه بوست

    ردحذف
  29. فكرتى شيمو ^_^

    الله يسلمك ياقلبي ربنا يخليكى

    والله انا انشكحت بشده اوى من كلامك دة

    ربنا يخليكى ويجزيكى خير وسعاده حق البسمه اللى رسمتيها علي وشي دى

    نورتينى واسعدينى وشرفتينى وكل حاجه كل حاجه يعنى :)

    ردحذف
  30. محمد :)
    الله يسلمك :)

    واللهم آمين يارب يارب

    شكرآ كتير نورتنى جدآ :)

    ردحذف
  31. نور ريموسه :)

    وحشتينى اوى اوى علي فكرات كدة تلاته
    الله يسلمك يابنتى

    اوكى وهو كذلك جو يابنتى نحن ندعمك بشده

    عارفه احلى حاجه لما بيحصل كدة
    بتكتشفي معدنهم الاصلي فمش هتقعدى تفكري
    مع نفسك كان ممكن اقول كذا او اعمل كذا
    وفي نفس الوقت انتى مجتيش علي كبريائك ولا حاجه :)

    ههههههههههههه متتغظيش مش هذكرة تانى خلاص خلاص :)

    نورتينى ياقمر اوى اوى <3

    ردحذف
  32. دودو :)

    تمام يا دودو ما هو انا للافس يابنتى كدة برضوا قطيعه
    بس خلاص الموضوع بقي متعب اوى فلازم احيانا نتنازل ونعترف بقي :)

    بالظيبط كدة هى القاعده دى ^_^

    سلامه قلبك ياقمر انت

    في يا دودو انتوا اه والله

    الله يسلمك ياقلبي

    ربنا يخليكى

    نورتينى اوى :))

    ردحذف
  33. مهجتى مهجتى :)

    نياهاهاها هى دي بقي
    غلطتى اتصلت وقلتلك هههههههههههههههههههههههه

    معلشي غلطه مطبعيه بس حاسيت الناس هتمل كل شويه مها ودينا ورحمه ونيلي ههههههههههه هيملوا مننا يابنتى

    واضح فعلا :D

    بنشكح انا من كومنتاتك يابنتى والله :))

    ردحذف
  34. نسومه :)
    ههههههههههههههههه
    والنعمه ضحكتينى يا شيخه روحى وانتى وحلوة كدة :)

    ربنا يرحمهم ويرحمنا احنا كمان

    هههههههههههههه اشتاتآ شلوت يا نسومه ايه بقي :))

    انا وانتى والجميع ونتلم ونعمل هيصه وتبقي في بيتها برضوا بيت مين بقي دة ؟؟؟

    بيجد هى حلوة بس متعبه يعنى
    بس خيييير

    عينى هكتب واصدعكم واى كلام فاضي معقول ^_^

    نورتينى وش مبتهج:)

    ردحذف
  35. نسومه
    الله يخربيت كدة
    انا شوفت انك نسيتى وقولت هعلق في الكومنت عليكى
    قومت انا كمان ناسيت برضوا:))))))))))))))))
    الله يسلمك يابنتى ;)

    ردحذف
  36. ميرو اميرة :)

    الله يسلمك ياحوبي
    هاخد حاضر حاضر
    انا اكيد هنبسط
    مع انى مبفكرش من زوايه ان هيجى يوم
    ويتردلى حاجه بس لو حصل اكيد برضوا
    مش هنكر هنبسط :)

    نورتينى ياقمر

    ردحذف
  37. احمد :)

    هكتفي بالضحك هههههههه والرد عندك انت بقي انت خلتنى اضحك بيجد انك فهمت كدة بس ينهاري ^_^

    نورتنى يا سيدى يلا :)

    ردحذف
  38. ريمو ريمو هون ياجدعااااان

    :)) الله يسلمك ياقلبي
    واطمن عليكى دايما كدة يا اختي

    انتى عرفانى انا لما بغم بغم اوى هههههههههههه

    ربنا يخليكى ليا ياقلبي انتى
    وتنورينى دايما كدة وتشرفينى ^_^

    ردحذف
  39. فراشتى مونتى ^_^

    يابنتى الامهات بيشيروا نفس الاسطوانه لبعض وماشين بمبدأ اغنيه اجيال ورا اجيال هههههههههههه

    ربنا يخليكى مبسوطه ان المقولات عجبتك
    مستنياكى ياعسل :)

    ولا انا معرفش ازاى ههههههههههههه

    صح بالظيبط كدة يا اختى ونبي عاقله :)

    الله يسلمك ياعسل انتى

    نورتينى اوى اوى وشرفتينى جدآآ يا مونتى بنبسط اوى بوجودك بيجد :)

    ردحذف
  40. سمسم :)
    انتى احلى ياقمر انت
    نورتينى جدآآ

    ردحذف
  41. دندن :)

    حبيبي الله يسلمك ياقلبي
    افضل بالادويه اهو ;)

    ايوان والله يا دندن اسوء بمراحل كبيرة

    وانا بحبك كمان اكتر من الكلام وبرة التدوين احم احم كسفتينى والله بجملتك دى بس يلا ههههههه

    ههههههه واى نشاط يا اختى انا وقفت نفسي خوفت عليها الصراحه هههههههههههههههه

    ههههههههه يا شيخه مش كنتى قولتى كدة كنتو فتحتوا المدونه لقيتوها في وشككم كدة ^_^

    يا دندن ياجامده انتى يافاهمط
    بيجد يعنى انتى بتفهمى اوى فعلا
    يا دندن وبحبك لانك لامحه لاي كلام بيتكتب كدة ودى حاجه نادره ^_^

    سعدنى وجودك جدآآآ ^_^

    ردحذف
  42. هبه استاذتنا منورانا مرة واحده الله

    هههههههههههههه ماشي ياعم يارب المرة اللى جايه تكونى رايقه ومش واخده منها حاجه برضوا ^_^

    الله يسلمك ياقمر انت يكفينى وجودك والله يقومنى من اى برد واى تعب يعنى ;)

    مبسوطه ان الهوامش عجبتك
    ايوة حد ادانى ورد ومش اى حد يا ناس تيرارار نغيظهم شويه بقي

    الله يسلمك وكلامك جميل اوى
    ودايما بيسعدنى تواجدك الراقي والهادى دة ^_^

    ردحذف
  43. استاذ ابو داود

    الله يسلمك
    وربنا يخليك علي كلامك دة مش عارفه اقول إيه انا والله مع كلامك دة

    شكرآ كتير ونورتنى جدآآ :))

    ردحذف
  44. ساره :)

    وحشنى وجودك وبوستاتك جدآآ

    اكيد يارب الاقي بقي الوقت دة
    يارب

    يبقي سمعهم تقيل اوى يا ساره اكيد
    وهما الخسرانين يعنى

    انتى اجمل

    وانا وحشتنى كل حاجه منك
    والمكان بيبقي منور بيكى بيجد
    ولا اسف ولاحاجه مافيش كدة بينا

    نورتينى اوى

    ردحذف
  45. اة زناتى ياخوفي ^_^

    لا وإيه بيقولك شئ ما وهى اشياء مااااااااا المدونه بتاعتك محتاجه ميه وانت سايبها عطشانه ^_^

    هههههههههههههههههههههه
    دة اول حدث يا راجل
    طيب دة المتوقع منى
    انا كدة بيطلع منى الكلام الجامد زى اى كلام برضوا مالوش وقت هههههههههههه
    __________________

    ايه حكايه هندسه وبشمهندس انا مش من هوناك خالص نيفر نيفر هههههههههههه
    __________________

    لما انت لحقته علي الباب
    تعالي الحق بتاعى بقي
    واديله قلمين دى مش اخوه
    كومتريكس دة تيييييييييييت فعلا اوى
    ___________________

    استغفر الله العظيم
    اشتاتآ شلوت
    ابعد عنا الشيطان والحسد يارب
    ممكن تبوظ اة انما أتكلم فصحى
    وعليك لعنه الفراعنه والكلام دة ماليش في هههههههه
    _______________

    وانا امتنع عن التصويب
    __________________

    علي فكرة والله عارفه انها كدة
    بس ماما لما بتنطقها بتقولها كانها
    مش ذ بل ز هههههههههه
    فبكتبها كدة وبعدين عود نفسي عليها
    والغريب كل اللى رد عليا كاتبها زى ^_^
    ______________________

    ناسيت كلمه بيجد
    بتاعتى اهئ
    بس هعديها علشان كتبت فعلا
    بس
    بسات
    انتصرت
    بكرة انتصر انا
    عادى في المهندسين هههههههه
    بسات بقي الله رغاي اوى انت
    ;)

    ردحذف
  46. سوكتى سوكتى :)

    انتى احلى بكتير ياقلبي
    بنشكح وبزقطط لما بلاقيكى هون

    اديكى عرفتيها يا سوسه انتى <3

    الله يسلمك ياقلبي
    انا خفيت بدعاكى بيجد يعنى

    اموااااه

    ردحذف
  47. مساء الياسميين علي عيونك
    يا ريموسه ^_^

    والله القلوب عند بعضها يعنى

    حاضر مش هبص ولا هتغر انا اطول يابنتى انتى تقولى عنى كدة ياعسل انتى

    الله يسلمك فعلا جو متتعب اوى اوى :)

    ههههههههههههه عندك حق يابنتى انا لازم تدخلى تتخانقي معايا انا بتخانق مع نفسي علشان اقرالكم حاجه وافضل مخنوقه منها لما يبقي ملهاش مزاج تقرأ بس وراها

    ههههههههههههههه انا قولت الامهات بتورد الاسطوانات لبعض محدش صدقنى

    ربنا يخليكى يا ريمو انتى اللي قلبك ابيض مثلك تماما

    لوجودك ذات العبق
    ومبسوطه اوى اوى بوجودك دة :)

    ردحذف
  48. شموسه عندنا

    يا هلا يا هلا

    ايوان خمسه وخمسه بترقينى من الحسد شكلك


    الله يسلمك

    وربنا يرحم الجمييع ياقمر

    اسعدنى تواجدك كالعاده وطلتك دى
    تساوى عندى كتيير اوى ^_^

    ردحذف
  49. زناتى
    هههههههههههههههههههههههههههههههههههههههههههههههه
    بتهرج فرخه مشويه كمان ودة عملها ازاى وولع الجزء دة علي الفحم ولا إيه

    ماشي باعم جنان

    اوكى انا مستنيه انا اى حاجه اطلبها ياريت تتعمل علي طول مبحبش اهاتى انا
    فلخص بقي وخلى دوره دوقت
    ^_^

    ردحذف