2012-07-16

لمـــــــــــــا !! ( هلاوس2)

هامش اولى 
محدش يسالنى فين الهلاوس الاولى لانها كانت من زمان
ومكسله اجيب اللينك  نيهاهاها

هذه الهلاوس ليست دواء لكآبه مجرد اعترافات هلاوسيه
وكتبتها وانا فرحانه يعنى محدش يقولى كآبتينى
لازم في مرحله ما نعترف بالحاجات اللي بنقابلها علشان نتخاطها
او نحاول التأقلم معاها ليس اكثر




لما بكون مضايقه مبعرفش احس حتى الحاجه الحلوة.

لما بكون مش مركزة بنسي كل حاجه حصلت في اليوم
سواء وحشه او حلوة
مش بفتكر غير الاساسيات ..

مرة قرأت لعبد الوهاب مطاوع قصه عن اول مرة يعمل تقرير وكان عن طلاب الثانويه العامه وسبب انتحارهم واستدعاه رئيس الاهرام وقتها وقاله ان التقرير كويس جدا لكن متسرفش في استخدام النقط وعلامات الاستفهام او الاستعجاب فحتى لهذه الاداوات طريقه لتعبير عن ماذا تريد
من وقتها وانا بسرف في استخدامهم علشان انا عارفه كويس لما بستخدمهم انا ببقي عايزة بيهم إيه .......................................

لما كل شئ فجأة بيبصبح مالوش معنى هو دة الشعور الطبيعى لزهق.

لما بقول كتير مبحبش الخصام والزعل ومع ذلك دايما اللى حواليا بيدخلونى فيهم
بحس انى في متاهه هقضي سنين عمرى جواها ....

لما ميبقاش في عندك حاجه تديها لازم الناس تفهم دة بس غالبا هما مبيفهموش..




لما تطلب طلب صغير يتحققلك مرة واحده بس تطلب حد يقف معاك صح ينقل كلامك زى ماهو فتلاقي بينقله علي مزاجه فترجع انت تظبط امورك بنفسك
وبعد ما كنت بتؤمن اوى بوجود ناس كويسه اصبحت لا تؤمن بنفسك حتى ...

لما ناس كتير تكون بتدعيلك بس الدعوه محجوبه فتفضل تقنع نفسك انه اكيد دة راجع لحكمه آلهيه!!

لمـا بعد ما الدنيا تضحكلك ترجع تكشر ليك فانت تصمم تضحك برضوا يااااه!!

لما تتحدى ناس كتير بسبب حد بس الحد دة مش مستعد يشوف تحديك بتحس ان اللى بتعمله في حد مرة واحده رماه علي الارض وداس عليه..

لما يضايق منك شخص فتكون طريقته الوحيده هى الهروب .........

ابتعد عن الأشخاص الذين يحاولون التقليل من طموحاتك بينما الناس العظماء هم الذين يشعرونك أنك باستطاعتك أن تصبح واحدا منهم.
الدكتور الراحل ابراهيم الفقي

لما فكرت في الجمله دى  كتير وبالمناسبه لسه شايفه وانا بكتب حاسيت انها جمله غريبه ملهاش اساس احياناً الوجود مع الاشخاص المقللين من طموحاتك بيشعرك بهدفك وانت عايز ايه بالظبط ووجودك مع اشخاص عظماء ومحققين اشياء كتير بيخليك تحتار انت عايز إيه تكون زيهم ولا تكون مختلف عنهم ......

لمــا بحس ان الحياه محتاجه حبه تفاهم ( يعنى زى ما قال ربنا موده ورحمه)
لو الناس كلها ماشيت بالمبدأ دة كنا يمكن نرتاح بس يمكن مكناش اتعلمنا نفرق ..


لما تحاول تمسك تليفونك علشان تقول حاجه لحد بس مش عارف تقوله إيه ماهو مبقاش في كلام يتقال بعد اخر حاجه حصلت...

لما تشوف حد صدفه وعينك تيجى في عينه وتحس ان كل الزمن اللى عدى والبعد اللى حصل لسه في حاجه بتربطكم بس مش قادر تعرف هى إيه !!!

لما روحك تشوفه قبل عنيك وتحس انك عايز تجري عليه تقوله علي فكرة مبروك انتوا انسب اتنين لبعض بس اللى حصل مش سامحلك اصلا تتكلم لان باختصار المسافات طولت اوى .........

لما تحس المسافه اللى بينك وبين حد اصبحت بعيده زى علامه الى ما لانهايه كده عمر مافي طرف هيقدر يقابل الطرف التانى ...


لما تكره كل شئ بيحمل شقين...

لما تفضل طول اليوم تتندن مقطع من اغنيه حمزة نمرة
لو يوم لقيت ،، نفسي انحنيت
واحتجت من ضعفي ،، بلاش تتاخروا
الناس تغيب بس انتو لازم تفضلوا ،، خايف اكون في الدنيا وحيد
عمري يهون ،، اضيع وانتو بعيد
فتدور كده شويه تلاقي في ناس كتييير اوى حواليك ربنا حطك في طريقهم وحطهم في طريقك لغايات كتييير يمكن دوال اللى عمر ما عمرى هيهون عليهم لانى افنيته في حبهم ..

لما تكتب علي الفيس هو ليه كده ها؟؟
فتلاقي اللي يقولك هو كدا وخلاص
واللى ربطها بالقدر والنصيب
واللى قالك غتاته
وانت نفسك ترد وتقول هى حاجه تانيه خالص
بس منتش قادر تتكلم !

لما تكتب بوست كامل
عن اللى بتحبه ومش بتحبه
وتلاقي الناس كلها تكاتفت
علشان تعمل كل اللى مش بتحبه
يبقي اكيد الدماغ دى متركبه غلط

عارفين اخره الهلاوس دى ان عقلي بيرفضها بعد كتاباتها
لان بمنطقيه شديده انا عارفه السبب في كل شئ بيحصل
بس مش قادرة اتقبله وهتكون دى مشلكتى الابديه 
بس قابله للتغير في بعض الظروف
:))
اضغط

هناك 16 تعليقًا:

  1. مليانه غمووووض سيادتك … بس عجبني كلامك كله بصراحه … هرد بالتفصيل ع الميل لو ما عندكيش مانع ;)

    ردحذف
  2. عارفه
    انا واقفه قدام البوست ده مش عارفه اقولك ايه
    بس حاسه انك بتقولى حاجات جوايا انا مش عارفه اقولها !!
    الاهم اننا دايما بنحاول نقنع نفسنا اننا مش فاهمين او مش عارفين اللى بيحصل بيحصل ليه
    بس المشكله اننا بنبقى فاهمين وعاملين مش واخدين بالنا !

    ردحذف
  3. جميل اوي البوست
    بجد حسيته اوي لاني ساعات بتنتابني حالة من التخاريف ( مرادف هلاوس D:) وغالبا مش هلاقي حد يستحمل التخاريف بتاعتي
    فبنزلها في المدونة من ناحية الفضفضة الالكترونية D:

    خالص التقدير لفكرك وقلمك
    وربنا يريح بالك ويسعدك في الدنيا والآخرة

    تقبلي مروري
    Casper

    ردحذف
  4. اولا انا فتحت البوست مرتين وقفلته عشان حسيت اني مكنتش مركزة ودلوقتي مبسوطة اني عملت كده لنه فعلا محتاج تركيز
    مش عارفة ارد في تعليق او كام سطر حاسة ان الموضوع محتاج مناقشة كاملة .. كتبتي حاجات كتير جدا حاسة بيها والاحساس والصدق واضحين اوي في الكلام والجزء ده صح 10000 %
    عارفين اخره الهلاوس دى ان عقلي بيرفضها بعد كتاباتها
    لان بمنطقيه شديده انا عارفه السبب في كل شئ بيحصل
    بس مش قادرة اتقبله وهتكون دى مشلكتى الابديه

    ردحذف
  5. حلو البوست
    وحلوه الفضفضه والهلاوس
    وحلو الغموض الى بين الكلام
    رائعه يا رونا

    ردحذف
  6. ايه ده يارنا يابنتي

    انا ظني مايخيبش ابدا

    من زمان وانا عارف انك فيلسوفة

    باختصار كدة ومن غير مااعيد قراءة البوست تاني

    عمر الدنيا ماتحارب الا القوي

    علشان بتبقي عايزة تكسره

    بس في النهاية هي دنيا

    او دونيا جاية من الدونية

    مبتديش محتاج

    ولو دورتي عليها تديكي ضهرها

    ولو اهملتيها تجري وراكي

    بس شطارتك لما تجري وراكي

    متعبريهاش

    ثانيا

    بمناسبة الدكتور ابراهيم الفقي رحمه الله

    كان فيه زمان مثل بيقول

    ((من جاور السعيد يسعد ))

    وده تقريبا نفس المعني الللي قاله

    بمناسبة الاستاذ عبد الوهالب مطاوع بقي

    تعالي بقي يارنا يابنتي اشدك من ودنك

    علشان انتي عايزة تعيدي ابتدائية من تاني

    اسراف بالسين مش بالصاااااد

    محاميين ايه بس دول ياربي

    هههههه تحيتي رنا الشقية

    ردحذف
  7. اسراء براحتك يا فندم
    غموض دى واضحه زى وضوح الشمس :)

    نورتى يابنت

    ردحذف
  8. دندن

    عارفه انا كنت واثقه انك هتقولى كده :)

    وكلامك مظبوط جداااا :)

    اسعدينى بكلامك دة احساسك بالبوست دايما وردك بيكون مختلف :)

    ردحذف
  9. كاسبر :))

    ربنا يخليك علي دعوتك ولك المثل مضاعف اكثر :)

    بالطبع لن نجد غير مدونتنا تستحملنا :)

    نورتنى جدا بعد غياب كتيير حمد الله علي السلامه :)

    ردحذف
  10. الفضفضة سواء بالكتابة او حتي بصوت واطي بينا وبين نفسنا بقت جزء مهم من تفاصيل حياتنا حاليا لاننا من الصعب حاليا اننا نلاقي حد يفهمنا ويحس باللي حاسين بيه واحيانا لما نتكلم مع حد نحس انه عايز يقول خلص بلاش وجع دماغ فنضطر اننا نقعد مع نفسنا ونكلم نفسنا
    عجبني البوست ده اوي تسلم ايدك

    ردحذف
  11. نور يعنى قراتى بوستى تلت مرات

    انا سعيده :)))

    الله يخليكى الاحساس دة نعمه عند كل اللى اعرفهم الحمد الله
    في ناس بقي كده معندهاش احساس خالص ربنا معاهم

    نورتينى :)))

    ردحذف
  12. لما تكره كل شئ بيحمل شقين...

    لما تفضل طول اليوم تتندن مقطع من اغنيه حمزة نمرة
    لو يوم لقيت ،، نفسي انحنيت
    واحتجت من ضعفي ،، بلاش تتاخروا
    الناس تغيب بس انتو لازم تفضلوا ،، خايف اكون في الدنيا وحيد
    عمري يهون ،، اضيع وانتو بعيد
    فتدور كده شويه تلاقي في ناس كتييير اوى حواليك ربنا حطك في طريقهم وحطهم في طريقك لغايات كتييير يمكن دوال اللى عمر ما عمرى هيهون عليهم لانى افنيته في حبهم ..
    وكأنك بتقولى كل حاجة جوايا وتوصفيها بدقة شديدة جدااااااااااا
    وانا زيك على فكرة كل حياتى مليانة هلاوس زى دى بالظبط
    أبدعتى بجد يارنا:))))

    ردحذف
  13. عجبانى الهلاوس جدا ومصرة تدورى على الاولانيه هه بس

    انا كمان من ساعه ماقريت القصة دى لمطاوع وانا بحط نقط بالهبل ههههههههههههههه

    ردحذف
  14. رونا الغالية
    لما ولما ولما ولما
    انتى يا رونا لمّيتى اللمات كلها وجعلتى لكل لمّه موضوع واقعىيقابل محله فى حياتنا ويعكس مرارة الزمن الذى نعيشه باسلوب ناعم هادئ
    برافو برافو برافو عليكى ونطلب المزيد والمزيد

    ردحذف
  15. آآآه لو نتقبل الحاجات زي ما هي يا رنا
    الحل في الرضا

    ردحذف
  16. ولما احس انك بتقولي حاجات كتير بحسها بش مش عارفة او مش عاوزة اقولها و لما اقف قدام البوست واحس هي دي فعلا هلاوس وارد على نفسي واقول
    I don't think so :)
    بوست حلو اويييييي
    ربنا يريح بالك يا رونا يا حلوة :)

    ردحذف