2011-07-13

يوميات طالبه اوشكت علي التخرج (ا)



السلام عليكم ورحمه الله وبركاته :)

هذة يومياتى في الجامعه التى اوشك علي التخرج منها يـــارب" كليه حقوق العزيزة"

كانت ليا بمثابه المعزة رشيده مع بكار لايمكن الاستغناء عنها:)

وكعاده رشيده وهى تحب ان تداعب بكار وتدلع عليه حيث ان لاشئ يرضيها

كانت كليتى كذلك كلما ادينا فيها وسكتنا تركب علينا وحينما نحب نرد لها بعض الجميل مما فعلت فينا

تقلب علينا وتبهدلنا ومؤخرآ بدات تتعدل في بعض الاحيان
ومش تطلع لينا النتيجه غير اخر السنه منتهى العدل...

المهم انا دخلت العالم الغريب دة وكلى امل تقولولى جبتي منين الامل ماهو زى مافي في حياه اى حد سعاد وفاطمه في امل عادى يعنى :D:D

 طبعآ انا دخلت الكليه وفقآ لمجموع اللي بيجى بعد تعب السنين في عنق الزجاجه العاميه ويصفونا 

 واحده واحده علي راي الشاعر الجليل ايمن بهجت والمغنى العظيم حماقي :) وبعد التصفيه بنتوزع 

احنا الطبقه التانيه من الثانويه علي الكليات اللي لسه مستنيانا علشان تاكل عيش

نعم فيا عزيزى القارئ ما الكليه الا مصدر لاكل العيش احنا بناكل عيش علي بعض علشان نزق عجله التعارف

والكليه بتاكل عيش مننا علشان كل ما تتدفع اكتر تتحمى من انك تشيل مواد اكتر :) نظريه 

المهم نعود لامل اللي دخلت به والرؤيه اللي كانت في بالي زى اى حد طبيعي بل وطبيعي جدآ كمان اومال ايه احنا مش اقل من اي

حاجه ممكن تتقال رؤيتى انى كنت هدخل عالم تانى اطور فيه ابدع فيه اهو اي شئ فيه طالما طالعنا من الثانويه واخدين رصاصه فشنك

كان نفسي تصيب المرة دى ماهو مكنش في خيار كتير لتصيب لتخيب واجاركم الله الخيارين دوال كانو خيارين بايظين معانا 

واحلامنا والله كانت بسيطه حتى رؤيتنا كانت واقعيه اكتر ، اول يوم دخلنا الجامعه عموما قولنا احنا جاينا غلط البشر دى كلها جات امتى

بتدرس معانا هنا والغريب ان محدش كان في المحاضرات غير نوعين فقط سنه اولى اللي لسه داخلين ومش فاهمين حاجه

رجلهم جابتهم غلط تقريبا لمحاضرات وباقي السنوات عدد قليل كدة بيحضر من " بالدحاحين" " الطلاب الذين يسمون
او كما يطلق البعض عليهم "بالمجتهدين"
والباقي حفظنا الله من ذلك الشئ في جناين الجامعه لاسمح الله الناس دى لو دخلت محاضره يبقي يوم مش فايت

يبقي المدرجات هتتقلب والدكتور هيتحول وممكن احنا بسببهم نبقي مستذئبين اه مش بعيده يعنى 

المهم قررنا نثبت فعلا اننا سنه اولى وتوجهنا لمدرجاتنا وندور احنا فين لقيناها متوهناش اوى بس الحقيقه هو كان في شئ مقدرتش افهمه 

حتى الان احنا دخلنا بدري عن المحاضره بساعه كدة بس اللي كان واضح اننا جاينا متاخرين زياده عن اللزوم اما اننا دخلنا مكان تانى

وكان مما يبدوا وواضحآ اننا دخلنا اكبر مكان فيكى يا مصر لاتقولى استاد بقي ولامسارح تيجى ايه دى جمب مدرج زى مدرجنا 

دة احنا كان فاضل شئ نثبت به ان دة مش مدرج دة مسرح اننا نعمل مسرحيه علي الاستديج ونريح دماغنا ماهو كله تمثيل في تمثيل

الدكاتره بتمثل انها بتشرح واحنا بنمثل اننا فاهمين لاء وكمان بنسقف صدق فعلا الكليه مسرح كبير ونكمل احنا بفيها اوهام كتير

المهم ان احمدك يارب اخيرا لقينا مكان بس اوعوا اوعوا مخكوا يروح لبعيد وشوشو يلعب احنا لقينا مكان علي الارض فضل ونعمه

من ربنا دة الارض دى يا سلام مرتبه عاليه جدآ جدآ جدآ في مرتبات المدرجات :) 

دخلنا وقعدنا واستنينا اول دكتور وكلنا امل ان برغم دة كله اكيد اكيد احنا في مصر طبعآ بس بعد دة كله اكيد هنستفيد

طالبه لديها امل ............ وللحديث بقيه
اضغط

هناك 6 تعليقات:

  1. ههههههههههههههههه
    والله فكرتينى بالذى مضى
    بالظبط كنت زيك وداخله بنفس الامل رغم انى ماكنتش حباها اصلا
    بس الواحد اتصدم صراحه فى حكايه الكليه دى تماما
    وكانت غير احلامنا من صغرنا خالص
    انا بس عايزه اعرف انتى فى جامعه ايه
    اصل انا كنت فى عين شمس
    وكان الزحمه بنفس الطريقه اللى بتحكى فيها دى
    وكنا بنقعد على الارض وعلى الشبابيك وعلى كل مكان تتخيليه
    ناقص نروح نقعد جنب الدكتور
    فا عايزه اعرف هو عين شمس بس اللى كده والا كل الجامعات؟؟
    خليكى متمسكه بالامل ده
    الكليه مرحله وهتعدى واللى بعدها كمان اهم
    ربنا يقويكى وتخلصى على خير ان شاء الله

    ردحذف
  2. القمر منور عندى يا هلا با هلا انا هكمل ان شاء الله ويارب اقدر اضحكك اكتر
    بصي يا اختى انا معرفشي نظام الكليات التانيه لانى حقوق عين شمس شوفتى الصدف بقي انتى اول واحدة تشدنى مدونتها وكلامها في من فكرى وطلعنا كليه واحدة وجامعه واحده كمان صدف ههههههههههه
    وفعلا احنا كنا نكاد بنوصل لمكان الدكتور قدام الدكتور علي الاستيدج كدة يعنى والله ولى التوفيق

    ويارب ربنا معانا كلنا بس انتى اتخرجتى امتى وبتعملى ايه حاليآآ؟؟

    ردحذف
  3. يا محاسن الصدف
    شكل العيب فى جامعه عين شمس على فكره فى حكايه الزحمه دى
    انا دفعه 2009
    ومش محاميه عشان ما تتوقعيش فيا الموضوع ده ههههههه
    انا مابحبش المحاماه اصلا
    وحاليا مش بشتغل وشكله مش هيحصل كمان ههههههههههه
    فى سنه كام انتى دلوقتى؟
    ومستنيه منك باقى اليوميات بقى
    ربنا معاكى يا جميله

    ردحذف
  4. امممم بحب اسلوبك فى العرض :D
    يلا المهم انك خلصتى من الكليه الحمد لله :)
    عقبال الشغل علشان عايزه فى العيد آخد العيديه منك :D

    ردحذف
  5. والله يا دودو ولا انا بحب سيره المحامين احنا بالاسم كدة بس ليسانس هههههههه
    وانا ياستى خلاص خلصت اهو واتخرجت بفضل الله بس مكمله في اليوميات المريبه دى ان شاء الله :):)

    ردحذف
  6. ماشي يا سوكتى ربنا يكرمك يا رافعه المعنويات ومعلياها :):)

    ردحذف