2011-07-23

يا بــــــلادى



ممكن تكون احلام بنت لبلدها
ممكن تكون اوهام انها تغيرها
وتغير وطنها
بس الاحتمال الاكبر ان حبها
وعشقها لترابها
ممكن يخليها تقدر تكون احدى انجازتها
والاكيد طول ماعينى علي دم الشهيد
هقدر اكمل حلمه وافيد
واطرد كل اللي كانو سبب في قتلوا وحيد
هعلي صوتى وهقول لا
لظلم لاستهتار لا
لعيشه من غير كرامه واهانه لا
لناس بتقتل احلامنا
وتسرق افكارنا
وتزينا اهدافنا
لا لا لا
مش هنسيبهم ياخدوا حياتنا
طول ما بنعرف نحكم عقولنا
طول ما بنمشي بضميرنا
كل شيطان في بلدنا
هيهرب واحنا هنكون قد مصريتنا!!

2011-07-22

ان كنت ترانى كذلك...ارجوك ابتعد ...


انا لست بثفقة تعقدها
 او يوما تزايد عليها
 انا لست بلعبة تحركها
وتحاول تلعب بمشاعرها
 والهدف هو حاسمها
انا فتاة بسيطة
ولكني بداخلي ملكة
 تشعرك في لحظة برقتها
وفي لحظة غضب يتملكها
فتنهي في لحظة مشاعرها
 حينما تشعر بخطر يهدد مصيرها
 ويحاول ينهي كرامتها
انا لست مبعثرة لتلم أشيائي
 ولست مفكرة أخطر في عقلك
كلما اردت الشعور بنفسك
 ولكني سأقوي علي رفضك
وسأقوي ان أخذل عقلك
وسأنهي دقات قلبي وقلبك
 فأنا فتاة بسيطة أحبتك
 لكن لم ترضخ!!!

2011-07-13

يوميات طالبه اوشكت علي التخرج (ا)



السلام عليكم ورحمه الله وبركاته :)

هذة يومياتى في الجامعه التى اوشك علي التخرج منها يـــارب" كليه حقوق العزيزة"

كانت ليا بمثابه المعزة رشيده مع بكار لايمكن الاستغناء عنها:)

وكعاده رشيده وهى تحب ان تداعب بكار وتدلع عليه حيث ان لاشئ يرضيها

كانت كليتى كذلك كلما ادينا فيها وسكتنا تركب علينا وحينما نحب نرد لها بعض الجميل مما فعلت فينا

تقلب علينا وتبهدلنا ومؤخرآ بدات تتعدل في بعض الاحيان
ومش تطلع لينا النتيجه غير اخر السنه منتهى العدل...

المهم انا دخلت العالم الغريب دة وكلى امل تقولولى جبتي منين الامل ماهو زى مافي في حياه اى حد سعاد وفاطمه في امل عادى يعنى :D:D

 طبعآ انا دخلت الكليه وفقآ لمجموع اللي بيجى بعد تعب السنين في عنق الزجاجه العاميه ويصفونا 

 واحده واحده علي راي الشاعر الجليل ايمن بهجت والمغنى العظيم حماقي :) وبعد التصفيه بنتوزع 

احنا الطبقه التانيه من الثانويه علي الكليات اللي لسه مستنيانا علشان تاكل عيش

نعم فيا عزيزى القارئ ما الكليه الا مصدر لاكل العيش احنا بناكل عيش علي بعض علشان نزق عجله التعارف

والكليه بتاكل عيش مننا علشان كل ما تتدفع اكتر تتحمى من انك تشيل مواد اكتر :) نظريه 

المهم نعود لامل اللي دخلت به والرؤيه اللي كانت في بالي زى اى حد طبيعي بل وطبيعي جدآ كمان اومال ايه احنا مش اقل من اي

حاجه ممكن تتقال رؤيتى انى كنت هدخل عالم تانى اطور فيه ابدع فيه اهو اي شئ فيه طالما طالعنا من الثانويه واخدين رصاصه فشنك

كان نفسي تصيب المرة دى ماهو مكنش في خيار كتير لتصيب لتخيب واجاركم الله الخيارين دوال كانو خيارين بايظين معانا 

واحلامنا والله كانت بسيطه حتى رؤيتنا كانت واقعيه اكتر ، اول يوم دخلنا الجامعه عموما قولنا احنا جاينا غلط البشر دى كلها جات امتى

بتدرس معانا هنا والغريب ان محدش كان في المحاضرات غير نوعين فقط سنه اولى اللي لسه داخلين ومش فاهمين حاجه

رجلهم جابتهم غلط تقريبا لمحاضرات وباقي السنوات عدد قليل كدة بيحضر من " بالدحاحين" " الطلاب الذين يسمون
او كما يطلق البعض عليهم "بالمجتهدين"
والباقي حفظنا الله من ذلك الشئ في جناين الجامعه لاسمح الله الناس دى لو دخلت محاضره يبقي يوم مش فايت

يبقي المدرجات هتتقلب والدكتور هيتحول وممكن احنا بسببهم نبقي مستذئبين اه مش بعيده يعنى 

المهم قررنا نثبت فعلا اننا سنه اولى وتوجهنا لمدرجاتنا وندور احنا فين لقيناها متوهناش اوى بس الحقيقه هو كان في شئ مقدرتش افهمه 

حتى الان احنا دخلنا بدري عن المحاضره بساعه كدة بس اللي كان واضح اننا جاينا متاخرين زياده عن اللزوم اما اننا دخلنا مكان تانى

وكان مما يبدوا وواضحآ اننا دخلنا اكبر مكان فيكى يا مصر لاتقولى استاد بقي ولامسارح تيجى ايه دى جمب مدرج زى مدرجنا 

دة احنا كان فاضل شئ نثبت به ان دة مش مدرج دة مسرح اننا نعمل مسرحيه علي الاستديج ونريح دماغنا ماهو كله تمثيل في تمثيل

الدكاتره بتمثل انها بتشرح واحنا بنمثل اننا فاهمين لاء وكمان بنسقف صدق فعلا الكليه مسرح كبير ونكمل احنا بفيها اوهام كتير

المهم ان احمدك يارب اخيرا لقينا مكان بس اوعوا اوعوا مخكوا يروح لبعيد وشوشو يلعب احنا لقينا مكان علي الارض فضل ونعمه

من ربنا دة الارض دى يا سلام مرتبه عاليه جدآ جدآ جدآ في مرتبات المدرجات :) 

دخلنا وقعدنا واستنينا اول دكتور وكلنا امل ان برغم دة كله اكيد اكيد احنا في مصر طبعآ بس بعد دة كله اكيد هنستفيد

طالبه لديها امل ............ وللحديث بقيه

2011-07-02

:) smile to life



دائمآ كنت اقولها من سنين
ارددتها بشكل قوي لا ادري لماذا
كانت تمحى بعض الكآبه التى تحتل المكان احيانآ
كانت تزول عنى بعض الآلم التى لطالما حاولت تحملها
كانت تسعدنى حينما افكر ان لاشئ يساوى تلك الابتسامه
لذلك كنت اقوله وانا واثقه ان كل شئ سينتهى مثلما بدأ ......
smile to life :)

حاجه تفرح

حاجه تفرح بجد لما تشوف حد بتحبه فرحان ومبسوط
وبجد خاصه لما يكون قريب منك ممكن تكون مش متخيل اللي بيحصل
وقتها بس بتستوعبه بعدين البارح كان فرح واحدة صحبتى
كانت حاجه جميله جدآ وفرح وميتعوضش
طبعا دة بغض النظر عن الحقد الطبقي اللي ممكن يتواجد
والحقد المعنوى بس احنا كبنات منفكرش ساعتها بالاسلوب دة
وحاولوا تتقتعنوا بكدة :):)
المهم كان يوم جميل شوفت لحظات سعادتها
وشوفت لحظه كتب كتابها والعيله كلها بدمع وتبكى
لما تجمتع الفرحه مع السعاده الحقيقيه بجد بتبقي حاجه تسعد وتفرح اى حد
لامه العائله كلها وفرحتهم ورؤيتهم فرحانين بيك بجد بيبقي حاجه تفرح
وجودك جمب شريك حياتك اللي اختارته وربنا قدره ليك بيبقي حاجه تفرح
حاجات كتير جدآ بتفرح اي حد في يوم زى دة
هى دى السعاده والفرح الحقيقي اللي بتبتغى كل عائله
لاولادها وكل بنت لنفسها :)
ربنا يكرمها يارب واشوفها سعيده دايمآ